“Competencia ta pone bo yega, pero caracter ta locual ta pone bo keda”
ORANJESTAD – Diahuebs ultimo a tuma luga e Leadership Masterclass di PricewaterhouseCoopers caminda Ronella Tjin Asjoe-Croes, CEO di Aruba Tourism Authority tabata invita como orador. Como e unico hende muhe entre e lidernan di caliber halto manera sr. Eduardo de Veer, sr. Javier Wolter, Ing. Roland Croes, Ing. Luis Oduber, y sr. Ruben Goedhoop ya caba Tjin Asjoe a resalta; pero tabata na momento cu el a trece su experiencia y pensamentonan dilanti, cu el a manifesta visibelmente su gran conocemento y capacidad. Tur esnan na e evento a keda sumamente impresiona y inspira cu su participacion dunando un bista mas serca y personal di e lider actual di Aruba su oficina di turismo.
E CEO di A.T.A. a inicia door di reconoce cu nos isla Aruba, ta bendiciona danki na e bon fundeshi cu lidernan a crea den pasado. Esaki ta un fundeshi riba cual mester sigui inverti pa e evoluciona. Evolucion ta critico pasobra mundo ta den cambio constante y p’esey nos mester ta flexibel y cla pa enfrenta cada reto nobo. Liderazgo den e aspecto aki ta nifica laga bay di pensamentonan bieu y introduci maneranan nobo di pensa.
Tambe a gradici su mayornan y famia pa un bon fundeshi personal. Balornan manera traha duro y cu perseverancia, ta husto, tin integridad, tin respet, ta honesto y hiba un bida balansa, ta algun di e elementonan fundamental cu caracterisa e forsa di un lider. Tjin Asjoe-Croes ta di opinion cu ta na cas un persona ta cuminsa construi su caracter y caracter ta e nucleo di nos como hende; e fundeshi riba cual un hende su bida ta basa.
“Tanto caracter como competencia (‘competence’) ta importante,” e director di A.T.A. a bisa na e audiencia. “Bo mester tin e actitud adecua pa e proposito adecua. Competencia ta pone bo yega, pero caracter ta locual ta pone bo keda.” Tjin Asjoe-Croes ta argumenta e filosofia aki bisando cu competencia ta basa riba nos talento cu ta e donnan cu nos a nace cu n’e, pero caracter ta un escogencia cu nos ta haci den bida. Claro cu formacion ta base pa tuma cierto posicion y ta defini ki caracter ta desplega na ki momento.
Di e manera aki e director a pasa door di e diferente etapanan di su bida, for di infancia y estudio, te na experiencianan profesional den exterior y riba su propio isla. El a haci esaki, poniendo enfasis riba e enseñansa y decisionnan clave cu el a tuma y pone yega caminda cu e ta awe. Tambe el a gradici otro figuranan lider den nos comunidad, tanto femenino como masculino, for di cual e tabatin oportunidad di siña y traha hunto. Ademas Tjin Asjoe-Croes a duna hopi credito di su exito na e ekipo ehemplar cu e ta conta cu n’e na Aruba Tourism Authority.
Pa conclui, Tjin Asjoe-Croes ta conseha pa nos dedica mas tempo na crea amistad, dialogo y acuerdonan pa medio di e tradicional ‘handshake’, esta di duna un man personalmente. “Ban construi confiansa den nos comunidad y para hunto fuerte y uni, pa enfrenta asina di e miho manera, e mundo semper evolucionando cu nos ta biba aden.”
“Mi ta kere fuertemente cu mientras cu inverti den e competencia di nos pais ta importante; un enfasis grandi mester bay tambe riba construi caracter. Si nos por construi caracternan fuerte, nos lo tin un nacion cu por sigui para duro riba su propio pia,” asina director di A.T.A. Ronella Tjin Asjoe-Croes a finalisa su presentacion, ricibiendo un reaccion solido for di tur esnan presente.
Despues di su presentacion, Ronella Tjin Asjoe-Croes a gradici tambe pa e reaccion positivo. Durante e presentacion a duna elogio na PricewaterhouseCoopers pa e tremendo evento di liderazgo y a indica di ta gradicido pa e honor di por comparti escenario cu lidernan kende e ta respeta y admira.