Dos biaha pa aña ta controla nan situacion di salud
ORANJESTAD, Aruba: Den e siman di 17 pa 27 di October, MetaCorp a organisa su di dos chekeo di salud pa aña 2017. Personal di Wit Gele Kruis a bishita diferente compania subsidiario di MetaCorp pa controla e empleadonan. A haci chekeo riba peso, presion, sucu y colesterol. E prome chekeo tabata na luna di Mei y e empleadonan tabatin oportunidad un biaha mas pa controla si nan salud ta bon.
Pa basta aña Wit Gele Kruis ta haci chekeo na e empleadonan di MetaCorp, asina Lisbette Arendsz, kende ta “wijks coordinator” di Wit Gele Kruis a duna di conoce. Tin trahado cu ainda tin nan carchi di aña 2005 y durante tur e añanan por mira cu tin ta tene nan mes na e consehonan y tin otro no ta haci esey. MetaCorp tambe ta haci su esfuerso cu e empleadonan, unda ta duna nan e oportunidad pa bay gym of cana. “Por mira cu ta haci algo cu e resultadonan”, asina el a indica.
E reto di mas grandi ta sobrepeso. E problema aki ta hunga un rol pa colesterol halto. Tur biaha ta mira esaki y Wit Gele Kruis ta duna hopi conseho di cual ta spera cu e trahadonan tuma e guia na serio. E hobennan ta tende di Wit Gele Kruis, pasobra nan ta jong y ta duna nan tur e kehonan cu por bin despues. “Ta hopi importante pa nan cuminsa desde awo cu nan ta jong y no warda te ora nan bira mas grandi”, el a sigui elabora. Un persona cu bira mas grandi, ya caba ta haya e enfermedadnan cronico. Esaki ta algo cu tur hende mester evita pa yega asina leu.
E problema di sobrepeso ta bin pa motibo cu hopi hende ta come afo, pasobra awendia tur hende ta traha y ta dificil tin ora pa traha cuminda na cas mes. Esey ta pone cu ta topa cu colesterol halto, e peso ta subi y nan no ta move asina hopi, cana 1, 2 of 3 bes pa siman, bay gym. Tin hende si ta tuma e conseho y despues di algun aña por mira cu nan a baha peso y colesterol. Wit Gele Kruis a parti folder na empleadonan y den esaki ta poni kico tur tin menos colesterol, dieetnan special pa baha.
Lisbette Arendsz a sigui indica cu e empleadonan ta haya tur oportunidad pa haci pregunta, pero tambe por pasa cerca nan na Wit Gele Kruis of un dietista tambe por yuda nan den e parti aki.
MetaCorp ta existi desde aña 1920 caba den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den ATCO Concrete Products y Ecotech. Despues di dos guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi.
MetaCorp ta e empresa comercial mas bieu na Aruba y pronto ta cumpli 100 aña. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talentonan manera Eddie de Veer, Robert Carrasquero y Guus Slabbekoorn na cabes di e compania.