Home » MEP: Bos di pueblo ta bos di Dios Cu determinacion nos ta cumpli cu e deseo di pueblo

MEP: Bos di pueblo ta bos di Dios Cu determinacion nos ta cumpli cu e deseo di pueblo

by Admin
0 comment 98 views

E resultado di eleccion democratico, di dia 22 di september 2017, a duna e partidonan MOVIMIENTO ELECTORAL DI PUEBLO (MEP), PUEBLO ORGUYOSO Y RESPETA (POR) y RED DEMOCRATICO (RED) un mayoria total di 12 asiento den Parlamento di Aruba.

Diaranzon 1 di november, no a marca historia ora cu na pia di Sero di Hooiberg, e tres partidonan a firma e Programa di Gobernacion 2017-2021.

Den e Programa di Gobernacion aki, partidonan ta describi e metanan defini den e Acuerdo di Formacion mas detaya. Importante ta cu e vision comun di tur tres partido ta inclui den e programa aki, pa brinda pueblo di Aruba un gobierno basa riba bon gobernacion, transparencia y integridad den gobernacion y mes momento riba finanzas publico responsabel, cu como meta pa pone e ser humano central.

E programa di gobernacion pa e periodo di gobernacion 2017-2021 ta tene cuenta y ta implementa e puntonan di prioridad di e asina yama “Sustainable Development Goals” (SDG’s) di “United Nations Organization”, cual entre otro ta significa combati pobreza, hamber y desigualdad. Alabes ta promove sanidad, salud publico, calidad di educacion, calidad di trabao, crecemento economico sostenibel, innovacion den industria, infrastructura, energia sostenibel y pagabel pa e pueblo, mantencion di calidad di awa pa consumo, pero tambe di lama y asina yama “wetlands”.

Partidonan firmante ta reconoce e necesidad pa un entidad of organisacion independiente haci un investigacion y ta aproba e proposicion haci pa Sr. Gobernador di Aruba  pa realisa un investigacion na unda lo inventarisa e situacion y riesgonan financiero real di nos pais. Depues ta presenta un rapport cu lo contene un bista real di gastonan pendiente y debenan hereda di e Gabinete actual (2009-2017).

Alabes lo laga haci un investigacion amplio den tur departamento gubernamental cu ta sensitivo pa corupcion (“fraudegevoelig”) pa di e forma aki yega na medidanan apropia di eficiencia, “checks and balances, “auditing” y relatonan administrativo/financiero riba un base regular.

Partidonan ta acorda cu riba temanan cu eventualmente nan lo por diferencia di opinion y no por yega na un acuerdo, y/of riba cual no tin claridad absoluto di mandato electoral, lo institui un Colegio di Mediacion pa duna conseho na Gobierno y Parlamento segun un Protocol di Consulta, y cu ademas lo evalua introduccion di un Ley di Referendum Consultativo.

Na e ocacion aki, Lider di MEP alabes Formador, Evelyn Wever-Croes a expresa lo siguiente:

“Mescos cu Hooiberg ta para firme y central mey mey di nos isla, y ta wordo mira pa tur hende, asina tambe nos ta simbolisa e compromisonan cu nos a yega na dje den e programa di gobernacion pa brinda un gobierno solido pa e proximo 4 añanan. Treciendo e aire fresco di cambio cu Aruba a pidi p’e.

E tres partidonan a tuma e mensahe di pueblo cu a pidi pa un coalicion hopi na serio. Cu pasenshi y determinacion nos lo traha hunto pa cumpli cu e deseo di e pueblo.”

 

 

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio