Mi ta sumamente contento cu mi a crece cu votonan personal cu 300% compara cu na aña 2013. Mi campaña no tabata uno facil pero nos a logra. E sosten di nos digno pueblo ta mi forsa. Semper pone nos pais prome cu cualkier partido politico of interes personal. Mi ta hopi agradecido pa bo sosten den e ultimo eleccion pa Parlamento September 22, 2017. Aunke mi no a logra pa bira un representante den Parlamento cu votonan preferencial mi ta eternamente agradecido pa esnan cu a deposita nan confiansa di voto den mi persona. Siman pasa diahuebs a cera e periodo di Parlamento 2013-2017 y e di nuebe (9) Parlamento di nos pais. Diabierna ultimo a instala e Parlamento nobo transitorio pa 2017-2021 y e siman aki casi sigur lo yega na un Gobierno di coalicion entre e partidonan MEP/POR/RED. Cu esaki tambe lo oficialisa e Parlamento nobo number dies (10) y alaves un era nobo den politica Arubano. Nos di partido Movimiento Electoral di Pueblo (MEP) ta comprometi atraves di nos programa di gobernacion 2017-2021 presenta pa brinda nos digno pueblo e mihor gobierno posibel. Uno cu un signatura Social Democrata butando e ser humano central, crecemento economico, leynan pa proteha e clase trahado y pa brinda e mihor calidad di bida pa nos pueblo cu nos recursonan.
Masha danki pa boso sosten den e trabao noble y alaves difícil como candidato politico. Dios bendiciona Aruba y nos digno pueblo!!!