162
ORANJESTAD — Durante conferencia di prensa semanal di fraccion di MEP, lider di fraccion Evelyn Wever-Croes a duna di conose cu fraccion di MEP den Parlamento ta den un fase di transicion, pendiente e formacion di gobierno.
“E prome señalnan ta bisto caba di e cambio cu Aruba a vota pe: un Parlamento den man di coalicion y presidencia di Parlamento den man di coalicion”, Evelyn Wever-Croes a declara.
Guillfred Besaril, presidente di parlamento, a duna di conose cu como presidente den e periodo di transicion aki, su tarea lo ta pa guia e Parlamento na e sigiente nivel, e nivel cu pueblo ta spera di su Parlamento.
Rocco Tjon, parlamentario nobo pa MEP, a elabora riba su meta den politica riba tereno di husticia principalmente y a indica cu desde Parlamento lo eherse control riba gobierno.
Tambe Rocco Tjon a indica cu e awacero fuerte den fin di siman a causa masha hopi danjo y inconveniencia y cu fraccion di MEP lo reuni cu DOW pa haya sa ta kiko a bai malo, especialmente cu e careteranan nobo di Green Corridor y Watty Vos Boulevard cu obviamente no a pone atencion na un forma responsabel pa e awa pa pasa bai.
Hendrik Tevreden tambe a indica cual areanan tin su prioridad, y el’a indica cu e fraccion di MEP lo ta hopi critico den su rol pa controla gobierno.
Cu esaki lider di MEP a presenta algun di e caranan nobo den parlamento. :Mi ta hopi orguyoso di cada un di nan y mi ta desea nan hopi exito den Parlamento”, Evelyn Wever-Croes a duna di conose.