Home » Cu sosten di Fundacion Lotto pa Deporte Seleccion di Baseball AA a biaha pa Republica Dominicana

Cu sosten di Fundacion Lotto pa Deporte Seleccion di Baseball AA a biaha pa Republica Dominicana

by Admin
0 comment 72 views

Buscando pa competi den Weganan Centro Americano y del Caribe 2018 na Baranquilla, Colombia

ORANJESTAD, Aruba: E seleccion di baseball AA di Amateur Baseball Bond Aruba (ABBA) a ricibi uniform nobo di St. Fundacion Lotto pa Deporte, kende a sponsor e uniformnan. ABBA a gradici e fundacion p’e sosten cu nan a ricibi. E hungadonan tabata contento di ricibi uniform nobo pa representa Aruba na grandi.

Diabierna atardi e seleccion di 25 hungado y 4 miembro di staf a biaha pa Republica Dominicana pa hunga den e campeonato di clasificacion pa Weganan Centro Americano y del Caribe 2018 na Baranquilla, Colombia.

President di FLpD, mr. Di-Stefano Wernet RA, tabata contento cu nan por a sponsor e team pa asina nan por a bay afo. FLpD a sponsor ABBA cu 32.000 florin pa yuda paga tur cos cu tabata falta y pa asina e seleccion por a bay representa Aruba na Republica Dominicana. Elias Kock, miembro di FLpD, a indica cu nan ta contento di a duna sosten na e seleccion, pa motibo cu baseball AA tin hopi aña sin representa Aruba. E ta spera cu esaki ta un estimulo no solamente p’e hungadonan di dobel A, pero pa esunnan mas chikito cu ta creciendo den baseball. E fundacion a tuma e iniciativa pa sponsor e uniformnan pero tambe kico tur nan tabatin mester pa bay afo.

Manager di seleccion, Roderick Simon, a expresa cu pa hopi tempo un team di AA no a representa Aruba y pa cu esaki e ta contento. Esaki ta un bon vision no solamente p’e muchanan cu ta hungando den AA pero p’e muchanan creciendo den e deporte. Haciendo esaki e muchanan di center league, junior league lo sinti cu si nan traha duro, nan lo tin chens pa cay den seleccion di AA y esey ta unda cu nan kier yega.

E seleccion tin mas o menos 2 luna den preparacion, cual no ta suficiente p’e coach. Esaki ta un comienso unda cu Aruba ta cuminsa competi na Santo Domingo, pero tin un plan pa otro aña competi den mas campeonato den exterior.

Sherwin Howell, Presidente di ABBA, a indica cu a cuminsa cu e meta pa hisa Aruba su nomber na halto den baseball y pa haci esaki a bin cu un vision y awo ta trahando riba e vision aki. Hopi hende no a kere den nan, pero pa por logra yega leu un caminda mester cuminsa pa asina midi unda Aruba ta para. ABBA a gradici St. Fundacion Lotto pa Deporte p’e sosten ricibi pa asina e seleccion por bay afo y en busca p’e ultimo luga pa Weganan Centro Americano y del Caribe 2018.

Diabierna atardi e seleccion a sali pa Republica Dominicana y tabata contento p’e oportunidad ricibi pa representa Aruba. Nan a indica cu nan lo haci nan maximo esfuerso den e torneo, unda nan kier gana pa asina hunga otro aña na Colombia. E hungadonan a gradici St. Fundacion Lotto pa Deporte p’e sosten y uniformnan.

ABBA ta funda na September 1950 y ta miembro activo di COPABE.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio