ORANJESTAD, Aruba: Mediq a organisa un charla di “active shooter” pa su empleadonan. E charla aki ta pa informa riba “active shooter”, cu ta un situacion pasando mundialmente. Pa empleadonan di Mediq ta bon prepara pa cualkier situacion di “active shooter”, a conta cu presencia di Jose “Lito” Lacle y Liliana Rasmijn di departamento di Comunicacion, Informacion y Prevencion di Cuerpo Policial Aruba.
Empleadonan di Mediq a ricibi diferente informacion riba “active shooter” y con por prepara nan mes pa un persona cu tira riba otro. Nan a haya sa mas cu un “active shooter” ta un persona cu ta comprometi na mata of purba mata persona den un area limita y pobla. Den mayoria caso, “active shooter” ta haci uzo di arma di candela y no tin un patrono of metodo den nan seleccion di victima.
Tur e puntonan aki tabata importante p’e empleadonan sa, pa asina nan tambe por sa si nan yega di haya nan mes den un situacion di “active shooter”. Nan a haci hopi pregunta na e Polisnan, kendenan a duna diferente tip pa haci e ambiente uno mas sigur. Tur tip duna na e empleadonan di Mediq ta tipnan cu por uza no solamente na trabou, pero tambe den nan bida diario.