ORANJESTAD – Na juli ultimo DNM (Directie Natuur en Millieu) a haya notificacion cu e mangelnan na e saliña di Savaneta ta muriendo. Sin mucho tardansa DNM a tuma accion. A midi e salinidad di e awa y traha un rapport di e situacion. A constata cu tin un fenomeno di ”die-off”, pues morto gradual, di mayoria di mangelnan conoci como Mangel Tam (Rizphora mangle). A constata cu e salinidad di e saliña ta di un nivel mucho halto pa e sobrevivencia di e matanan.
Tambe a constata, cu un cas pega cu e saliña tawata laga su awa sushi bay pa e saliña (lozing van grijs en zwart afvalwater). E coremento di awa sushi aki den e saliña ta un acto di polucion cu no ta permisibel den nos leynan.
E investigacion preliminario di DNM a indica cu muy probabelmente e rason dicon e salinidad tawata halto ta, cu a kibra tubonan cu tawata conecta e saliña cu e lama. Esaki parse cu lo a tuma luga aña pasa durante trabounan di excavacion pa pasa cabelnan di coriente.
DOW a wordo notifica y a haci reparacionnan na e tubo cu tawata kibra y asina a habri esaki bek pa pasada di awa. Ademas di esaki DOW a laga pone un pomp pa asina manda awa di lama direct pa e saliña na Savaneta.
Salinidad tin un rol importante pa e crecemento y produccion di e mangelman. Por ehempel e nivel di salinidad tolerabel pa e matanan aki ta entre 32 y 34 ppt pero den e caso aki a midi un salinidad riba 70 ppt. Segun informacion cu DNM ta dispone di dje ta, cu un nivel mas halto cu 60 ppt ta mortal pa e Mangel Tam.
Ademas di e Mangel Tam tambe tin otro sortonan di mata manera Salachi, Mangel Shimaron, e Yerba di Cusinchi y e mata di Druif cu ta crece eynan.
Situacion actual:
E salinidad a baha den promer instancia despues cu DOW a pomp awa di lama den e saliña. Pero DNM a keda midi e awa y monitoria e area y esaki a bolbe subi debi na secura, evaporacion di e awa. Tambe no tin fluho di awa (doorstroming) ni tampoco refrescamento (verversing) regularmente di e awa. DNM y Dr. Lawrence Jones Walters a sugeri cu mester pone tubonan cu pasada di awa di lama cu ta yega e saliña y otro cu ta hiba e awa di saliña bek pa lama.
E comunicado di DOW di dia 23 october ultimo na prensa ta menciona cu nan ta studiando e dicon e matanan di mangel na e Saliña di Savaneta ta muriendo. Nos di DNM a caba cu nos rapport “ Afsterven Mangroven Saliña te Savaneta” y a presente tambe na Dr. Lawrence Jones Walters cu ta e ‘Head Biodiverse Environment’ na Wageningen Environmental Research (Alterra) cu a confirma e ponencianan cu DNM a rapporta. Tambe Dr. Lawrence Jones Walters a sugeri pa ora caba di drecha tur dos tubo y cu e awa su circulacion normalisa, pa sigui monitoria e area pa asina por tin un bista di e recuperacion di e matanan afecta cu ta bibo ainda y tambe e regeneracion di matanan nobo.