Home Entertainment Cla pa deleita comunidad di Aruba Jurick Salomon ta forma parti di...

Cla pa deleita comunidad di Aruba Jurick Salomon ta forma parti di frontline di 1OAK

SHARE

ORANJESTAD, Aruba: Jurick Salomon ta sigui cu un etapa nobo den e mundo artistico, unda cu e ta forma parti di e frontline di OAK, One Of A Kind. E ta un persona dispuesto pa yuda na tur momento cu fe grandi den Papa Dios cu t’ey pa guia y proteha su persona. E ta kere den e poder di “Team Work” cu a trece exito y logronan grandi den su caminda. Energetico riba nivel MAX, cu un sonrisa amabel semper pa un y tur.

E storia di Jurick Salomon pa musica a cuminsa na scol. Na aña 2002 a nace un idea entre hobennan amigo di forma un banda di scol cual a hiba e nomber Zoniq. E tempo ey cada un di nan bou di e edad di 18 cu e meta di entretene e otro coleganan di scol na e fiesta di fin di aña durante temporada di Pasco. Di akinan a nace e amor y a bira un carera mas despues den mundo di musica. Cos a bira mas serio y poco poco, pero sigur a cuminsa formalisa ideanan pa sigui cu locual a cuminsa como un soño di hobennan na scol den algo concreto. A forma e banda Fever na aña 2003 cu a gosa di exito grandi aki na Aruba. E banda aki a keda den farandula te cu 2005 na momento cu mester a pas’e over na miembronan pa sigui cun’e pa motibo di un decision na caminda. Estudio na Hulanda a habri porta pa un experiencia unico como artista/cantante. Un oportunidad p’e tabata forma parti di e banda mas grandi di e momento ey cu tabata Champagne Forever. Esaki tabata un reto p’e specialmente como un cantante pero tambe pa cualkier cantante hoben. “Mi no por caba di gradici nunca e oportunidad y experiencia aki di cual bou guia di artistanan / rumannan Shalton Seraus – Amos Balentin – Emiron Jansen, kendenan a forma e artista cu mi ta awe. Masha danki pa kere y brinda mi e conocemento cu boso ta gosa y crea exito cun’e”, el a expresa.

For di akinan e bida artistico di Jurick Salomon a cuminsa. El a forma parti di diferente banda di cual e tin memorianan unico. El a canta tanto local como internacional, di cual momento cu bo ta forma parti di conciertonan masha grandi mes cu artistanan internacional cu ta inolvidabel y ta marca rumbo di unda abo kier bay y kico tur bo kier logra como artista. Un etapa nobo ta cuminsa na momento cu temporada na Hulanda a termina y na momento cu el a regresa Aruba Jurick Salomon a forma parti di diferente banda. El a forma parti di Prive y D’Licious, pero el a haya e oportunidad di forma parti di un banda na Corsou. Aki Jurick Salomon como un Arubiano a forma parti di e frontline di Orkesta Vega. Eherciendo su trabou na Aruba a haci cu esaki tabatin su dificultad cun’e na momento cu tur diabierna mester a lanta vuelo pa asina presenta na nos hermana Isla Corsou cu Orkesta Vega. Na 2013 el a haya e honor di por a graba e prome tema musical cu Orkesta Vega na Corsou cu a hiba e titulo di “ Mi Mision” cu tabata bou guia y liderazgo di Amos Balentin.

Un temporada despues el a bay bek cu e banda D’Licious. Pa 3 aña Aruba por a mira hopi di dje den farandula cu e banda aki. Como Arubiano orguyoso nunca a keda falta su participacion den festivalnan cultural manera Himno y Bandera y unda cu por pa asina brinda homenahe na nos musica y arte. Jurick Salomon a tuma e decision na September pa no sigui cu D’Licious. Den un combersacion cu colega artista Jurainy Luckert, cu porciento ta un compañero di banda durante temporada na Hulanda, nan a cuminsa tira ideanan den halto y poco, poco a cuminsa yega na algo concreto pa cuminsa traha algo chikito. Asina aki hunto cu Jurainy Luckert, Rayner R.Y. Sprott y Donovan “Donn” Henriquez a forma e banda nobo 1OAK “One of a Kind”, cu un concepto full diferente pa Aruba. 1OAK ta cla pa deleita comunidad di Aruba cu nan canticanan.