ORANJESTAD, Aruba: E aña aki pa di 2 biaha consecutivo Aruba Baseball Clasico ta organisando e di prome Koninkrijk Spelen Baseball Clasico 2017. Nan ta haci esaki conhuntamente cu Brouwerij Balashi, cu ta sosteniendo deporte. E campeonato aki lo ta dedica na ex catcher Cecil Haynes y Carlos Devoir. E fecha di e campeonato lo ta di dia 2 pa 5 di November. Dia 3 di November lo tin e apertura pa 6:00 PM unda e teamnan lo desfila e atardi aki.
Edwin “Joy” Orman, President di e organisacion Aruba Baseball Clasico a splica cu esaki ta di dos aña cu nan tin e liga aki. Pa cu esaki nan kier a termina e campeonato aki, a dicidi di bin cu un campeonato internacional di Reino Hulandes. E campeonato aki a inicia dia 12 di Maart y a termina dia 14 di October, di cual a opta pa para e campeonato den temporada di vakantie pa asina e hungadonan tambe por a pasa un rato agradabel den famia. Aña pasa e campeonato tabata mas cortico, pero e aña aki esaki tabata mas largo. E organisacion ta satisfecho con e campeonato a bay y cu nan a termina na tempo, unda cu a termina 3 siman prome cu e campeonato internacional.
E campeonato a bay bon, manera nan a spera, asina coach di Leftovers EcoTech Rubert Paesch a duna di conoce. E campeonato aki ta pa hungadonan di 40+, kiermen hungadonan cu a yega na e edad aki y ta participa den e campeonato AA tambe por participa den e campeonato di Aruba Baseball Clasico cual ta haci e campeonato mas fuerte. Leftover EcoTech lo ta e seleccion blanco den e campeonato internacional y nan ta cla pa competi.
Nildo Wernet ta e manager di e team blauw y ta forma parti di Leftovers EcoTech. Pa dia di e competencia nan lo ta reforsa cu algun hungado mas y awo nan ta den preparacion pa asina duna un bon bataya den Koninkrijk Spelen Baseball Clasico 2017. Aña pasa na momento cu a cuminsa cu e liga di 40+, esaki tabata algo bon pasobra e aña aki a bin 2 team extra y tin mas wega. Nildo Wernet a expresa cu ta spera cu otro aña esaki lo ta mas grandi.
Den e campeonato internacional Aruba lo tin 3 seleccion cu ta Aruba White, Aruba Red y Aruba Blue, mientras cu Corsou ta bin cu 2 team y Hulanda cu 1. Durante e campeonato cu lo tin baluartenan di baseball di Aruba, Corsou y Hulanda cu lo forma parti di e teamnan. Algun di e baluartenan di Aruba ta Franklin Danies, David Leer, Piere Richardson, Juni Cham, Ferdinand Flanders y di Hulanda Ron Stewart, Tuyo Mari, Stanley Engelhart, Elton Koeiman, Gerald Dunlop. Pa Corsou ta Renato Anasgastie, Orcendo Clemencia, Deron Clara, Jeffrey Martina, Didi Greogrius Sr. y e Gran Pacheco.
Balashi y Aruba Baseball Clasico ta invita mayornan pa trece nan yiu y nietonan pa bin mira e Wold Series di Reino Hulandes den Baseball. Aki nan lo tin e oportunidad di conoce e pilarnan di baseball Arubiano y di Antias Hulandes. Dia 2 di November e prome wega lo tuma luga na Nadi Croes/Crismo Angela ballpark cuminsando desde 4:00 PM, dia 3 di November na Joe Laveist Ballpark desde 3:30 PM, dia 4 di November na Joe Laveist Ballpark desde 1:30 PM y dia 5 di November desde 11:00 AM. Entrada lo ta 5 florin pa adulto y muchanan bou di 13 aña lo drenta gratis. Tambe lo tin competencia di beach volleyball na Joe Laveist Ballpark riba dianan 3 pa 5 di November.
Balashi ta contento cu un biaha mas nan ta contribui na deporte, unda cu ta yuda engrandece y muchanan lo haya chens di conoce e baluartenan di baseball.