Zwarte Mangel, San Nicolas – Diamars den careda di 11’or y 35 di anochi, polis di San Nicolas ta wordo manda cu urgencia ariba e caminda pariba di K.I.A . Un poco mas panort, riba e caminda cu ta bay pa e ranchonan na Zwarte Mangel, pa un persona basta herida laga atras.
Na yegada e agentenan a topa cu un homber cu lo a wordo severamente maltrata. Loke nan por a saca afo di e homber aki, aparentemente nan lo a pasa auto ariba dje. E victima ta un conoci di polis.
Segun e homber di inicialnan F.G. kende a bisa polis, cu un primo di dje lo kier a mate, pero e lo a logra huy for di auto. Aparentemente e primo, lo a pasa auto varios biaha ariba dje.
Presencia di ambulance a wordo pidi cu urgencia, pero na nan yegada e victima a nenga di bay cu nan y tabata haci hopi fastioso.
Algun rato despues, e patruya na e sitio mes a transporta e homber pa Imsan, paso e lo a bira mas malo y tabata keha di hopi dolor.
Na Imsan ela wordo controla y a opta pa ambulance transporte cu urgencia pa Dr Horacio E. Oduber Hospitaal, pa un control mas extenso.