157
San Nicolas: Diamars pa mas o menos 7’or y mey di anochi na warda di polis nan ta tende un persona ta grita masha duro pafo di warda y nan ta scucha algo dal basta duro contra e glas di e porta.
Mesora e polisnan na warda a bay mira kiko ta pasando y ta topa cu e conocido exhibicionista Sambre, completamente sunu wantando e porta di bandi pafo cera, su tras un homber basta rabia, cu un biga di mas o menos 1.2 meter largo den su man y tratando di habri e porta.
E agentenan na warda a dicidi di habri e porta y pidi tur dos pa drenta paden. E homber di inicial JAIA a conta polis cu su persona hunto cu su primo y cu e primo su yiu muher chikito di 3 aña a cana bay na e minimarket na Seroe preto y ora nan tabata canando pa bay cas bek, den B. Van Der Veen Zeppenfeldstraat, na altura di Madereinse, nan a topa cu e conocido Sambre completamente sunu, Sambre a cuminsa baila, ela cuminsa haci movecionnan hopi vulgar y a cuminsa grita palabranan hopi hopi vulgar mes.
Na prome instante nan a trata di ignora esaki, pero na momento cu Sambre a dirigi su mes na e criatura di 3 anja bisando e mucha, “cu e tambe por join”, eynan e cabayero a bira furioso y a pasa man pa un pida biga y a core tras di Sambre. Dilanti di e porta di Warda di polis, ela bay pa dal Sambre cu e biga, pero ela her’e y a dal e biga contra e porta y a scheur e glas, tambe e bel na e porta dilanti a haya daño.
JAIA a bisa polis cu no tabata su intencion di destrui e glas di e porta y cu ta Sambre e kier a dal cu e pida biga, mirando e falta di respet cu e tabata tin pa e mucha chikito.
Mesora e conocido exhibicionista Sambre a keda deteni, Sambre no ta solamente un exhibicionista pero ta un adicto ambulante. Na Warda nan a bin ripara cu Sambre tabata soda pisa, su wowo tabata mane glas, e tabata papia wartaal y lenga pisa, indicando cu Sambre tabata basta bou influencia di un of otro substancia.
Slachtofferhulp a wordo poni na altura y a wordo pidi pa manda Sambre PAAZ, aparentemente den oranan di mainta elo a wordo transporta pa PAAZ pa e haya tratamento psichiatrico.
Segun e chef van Dienst di districto di San Nicolas, ultimamente durante oranan di anochi, constantemente dilanti Warda di Polis, Burger King, Kentucky Fried Chicken y Madereinse, Sambre ta kita su paña, ta cuminsa cana bibo sunu rond y esaki ta pasa frecuentemente den bista di muchanan chikito cu ta bishitando un di e establecimentonan aki, cu nan mayornan. Varios biaha Sambre ta core bibo sunu drenta warda di polis .
Na Carrubian Festival tambe hopi biaha tin molester di Sambre, na varios ocasion polis mester a bay busk’e y deten’e, pa motibo cu e ta kita su paña y cana bibo sunu memey di e turistanan, localnan y muchanan cu ta bishitando e festival.