ORANJESTAD, Aruba: Cuerpo Policial Aruba a facilita un charla riba “active shooter”, cu ta un situacion pasando mundialmente. A tene e charla na Holiday Inn Resort, suministrando informacion na empleadonan riba kico pa haci y con pa actua den situacion di un tiramento. Tur esunnan cu a atende e charla a keda contento cu e informacion y guia, pasobra a haya diferente tip cu lo yuda nan no solamente na trabou pero den nan bida diario tambe.
John Larmonie di e departamento di Comunicacion, Informacion y Prevencion di Cuerpo Policial Aruba a conta cu nan a ricibi un invitacion di Holiday Inn pa facilita un training na e empleadonan riba “active shooter”. E tipo di training aki Polis ta dunando pa 1 aña caba, pero pa mas o menos 2 aña ta studiando e tendencia nan mundial. A tuma nota cu si un pais no ta prepara p’e, ora cu e yega e ta causa hopi daño. Un caso di “active shooter” ta hopi violento y horibel, pero e ta bira mas teribel si hendenan no ta consciente di kico e ta y kico pa haci. Pa e motibo aki a cuminsa cu e trainingnan.
Cuerpo Policial Aruba kier pa tur empleado di tur hotel haya e curso, pero tambe lo desea di yega na otro negoshinan. Polis tin deseo di un dia yega na scolnan, pasobra e informacionnan aki ta hopi simpel. E unico reto cu nan tin ta con pa splica hende pakico e ta importante.
Cuerpo Policial Aruba a cuminsa ofrece e charla aki aña pasa. Holiday Inn Resort, pa subraya nan rol como ciudadano corporativo a haci tur lo posibel pa yega na Polis pa pidi un charla asina den un esfuerso pa conscientisa empleadonan riba tendencia nan, asina Lila Fernandez, Training Manager di Holiday Inn Resort a expresa. Rond mundo ultimamente ta pasando hopi “active shooter” y como hotel nan ta haya bishita di hopi hende, cu ta pone cu nunca por sa ki situacion por sosode. Holiday Inn kier pa tur su empleadonan ta simplemente consciente, alerta y ta preveni. Nan no ta rescata hende manera Polis, pero e informacion ta hopi importante pa nan sa kico por haci pa evita un situacion mas drastico.
E compania a probecha di e charla pa atende otro topiconan, manera di salud y siguridad. Nan a invita Cuerpo di Polis pa di dos biaha. Lila Fernandez ta di opinion cu ta bon pa tur hotel organisa e charla aki. Mester facilita e charla den un area unda cu tin hopi hende y esey ta un area cu e situacionnan aki por sosode. E organisacion tin un plan di accion pa un caso di emergencia y ta trahando riba dje. Nan ta trahando riba e procedura caba, unda cu e compania a manda informacion locual nan a haya for di Polis. Nan tin diferente liña di guia unda cu e compania a bisa nan cu tin e plan di core, sconde of ataca, y ta buscando kico tur mas lo por forma parti di e manual cu nan ta trahando actualmente riba dje.