Paradera: Diadomingo algo pasa di 6’or di mainta, polis, materialwagen di brandweer y ambulance ta wordo manda cu urgencia riba e caminda prinicipal di Paradera, na altura di Burger King, pa un auto cu a bolter y cu lo a kibra un palo di lus, causando cu full e bario di Paradera a keda sin coriente.
Na yegada nan ta bin topa cu un transformator di coriente benta abou, un palo di lus kibra den dos y un Suzuki Swift gebolter den banda contra un mata di kwihi. E chauffeur tabata pega den e auto y riba e auto tabata tin varios waya di coriente.
Mesora a pidi cu hopi urgencia pa presencia di Elmar, kita e wayanan for di riba e auto, pa asina brandweer por a cuminsa cu e trabounan di corta e auto, pa por saca e chauffeur cu tabata herida. Despues cu e chauffeur a keda libera, personal di ambulance a prepar’e na e sitio y a transport’e cu urgencia pa hospital.
Aparentemente e auto tabata biniendo cu velocidad halto for di pabou y e chauffeur lo a perde control riba e stuur, a baha caminda, dal contra un palo di lus y kibra esaki den dos, despues dal contra un mata di kwihi y a bolter.
Paradera y becindario a keda pa mas di un ora sin coriente y te den oranan di merdia, Elmar y Setar tabata na e sitio trahando riba e wayanan di coriente y di setar.