Home » AHATA: Ami ta Turismo Vercellio Statie gusta pa turistanan regresa contento

AHATA: Ami ta Turismo Vercellio Statie gusta pa turistanan regresa contento

by Admin
0 comment 52 views

Brindando nan bon servicio ta pone cu nan ta bisa otro

ORANJESTAD, Aruba: AHATA su programa “Ami ta Turismo” ta reconoce esunnan cu ta traha direct y indirect cu turismo. Setar a scoge Vercellio Statie, como un “Business Premises Expert” pa nominado di Ami ta Turismo. E ta un tecnico di Setar y ta acerca clientenan na momento cu nan tin cualkier problema, di cual e mester drecha esaki y lag’e optimal.

E tin 9 aña den servicio na Setar, unda cu el a cambia 2 biaha un funcion. Pero su trabou actualmente ta pa atende clientenan cu cualkier problema, cu mester “troubleshooting” y Vercellio Statie ta  esun cu lo presenta pa atende cu e situacion. E motibo cu el a tuma e trabou aki ta pasobra e gusta yuda hende. Ora e eherce su trabou door di yuda cliente y nota cu na final e cliente ta satisfecho, esey ta su meta principal. Setar a dun’e un bon oportunidad p’e haci loke e gusta.

Un momento inolvidabel p’e ta cu turistanan, pasobra tin biaha nan ta ricibi kehonan cu nan ta rabia y nan no kier warda mas, pero ora di yega cerca e persona e storia ta completamente otro. Aki ta unda el a topa cu nan ta jolly y tin ora nan ta ofrece bo pa bin un fiesta unda nan ta y esaki ta pone cu tin biaha nan mes no sa con pa reacciona.

Un conseho cu Vercellio Statie tin na esunnan cu ta drenta pa traha den turismo ta pa no pensa cu ta haya un trabou pa djis haci e trabou y bay cas y esey a caba. Pa turismo ta cu bo ta laga un bon impresion atras pa cualkier turista cu ta haci uzo di locual bo ta duna servicio y no pa akinan so, pero e turista por bay cas bek y bisa cu e servicio na Aruba tabata tremendo. Asina aki por tin mas turista cu ta bin Aruba.

Edwin Mohammed ta Manager Business Telecommunication System di Setar y ta hefe di Vercellio Statie, kende ta un persona y tecnico serio den su trabou. E ta un persona cu ora e termina cu su trabou, e ta gusta p’e cliente keda satisfecho cu e trabou cu el a haci. Hopi biaha ora cu Vercellio Statie bay un trabou, e ta den un posicion cu e tin di yuda un cliente cu problema, ora di haci esaki e kier laga un bon impresion di Setar y di su mesun persona. Esaki ta pone cu Setar ta balora e servicio y tecnico di Vercellio Statie.

Clientenan a duna hopi comentario di e servicionan di Vercellio Statie. Hopi den forma di e-mail e clientenan ta expresa nan gratitud, profesionalismo, cariño y carisma cu e ta brinda na nan. Asina cu e termina cu un trabou y bay, e clientenan ta keda cu un recuerdo ameno di e bon servicio cu e tecnico di Setar Vercellio Statie ta desplega. Edwin Mohammed ta recorda cu recientemente Vercellio Statie tabata na un area turistico y e tabata haciendo un trabou pero e tabatin problema cu esaki. El a tuma contacto cu Edwin Mohammed bisando cu e ta bay check un otro cliente pasobra e servicio na e cliente no ta trahando y e kier a mira si ta algo structural of algo di cliente. Esey ta e caracteristicanan cu Vercellio Statie ta brinda y esaki ta e parti fuerte di dje. E no ta keda na un cos so, pero Vercellio Statie ta purba haci lo maximo posibel.

E mensahe di e manager na Vercellio Statie ta p’e sigui progresa, p’e sigui haci e bon trabou y semper el a bisa Edwin Mohammed cu e gusta yuda hende. E trabou principal di Vercellio Statie ta yuda e clientenan, sigui haci asina, keda cu e mentalidad ey y sigui bay dilanti, asina Edwin Mohammed a termina bisando.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio