Home Politics Edgard Vrolijk di MEP: Gruponan importante den comunidad cu pa 8 aña...

Edgard Vrolijk di MEP: Gruponan importante den comunidad cu pa 8 aña no tabata vocifera nan preocupacion, awo a recupera nan voz!

SHARE

Desde resultado di eleccion di 22 di September nos por a sinti e cambio di inmediato. Nos por a sinti un biaha mas e forsa di democracia cu a bay perdi pa 8 aña largo, unda cu mayoria di e gruponan importante den comunidad cu pa 8 aña no tabata vocifera nan preocupacion, awo cu e resultado di eleccion a recupera nan voz. Y pa mi esaki ta importante pa tin un check and balance den comunidad y sigur ora bo wak cu sindicatonan ta trece padilanti nan puntonan di preocupacion pa un proximo gobierno, ta nada otro cu confirmacion di un maneho malo di Gabinete Mike Eman 1 y 2.

 

Mal maneho y falta di vision

Un ehempel ta e preocupacion di parti di sindicato SIMAR pa loke ta airco pa scolnan y gymzaal adecua pa nos educadornan fisico. Airco no ta un luho mas pero mas bien un necesidad ya cu debi na calor mester a reduci durante cierto simannan e orarionan di scol y ainda tin educadornan fisico cu mester duna les di gym riba un parkinglot cual ta muestra di mal maneho y falta di vision pero tambe falta di control di parti di nan representante y di nan doño di trabao.  E problemanan cu nos ta confrontando awe no ta bin despues di 22 di September 2017, pero  ta bin door di e maneho deficiente di enseñansa pa añanan largo y sigur e ultimo 8 aña unda cu placa ta ser malgasta tur caminda, menos inverti den e ader principal di un pais cu ta nos educacion. Nos a conoce un maneho cu hasta a prefera di coy placa di un scol hinca den un tram, haci show Green unda a gasta sumanan miyonario cu por a ser hinca den scolnan pa pone airco, cu awendia lo no mester a cera scolnan mas tempran debi na calor.

 

Falta control di parlamento

Tur e problemanan cu gremionan ta indica ta bin ora cu un gobierno ta hiba un maneho financiero pesimo pero tambe pa falta di control di parlamento, esta di esnan di signatura di e gobierno na mando, unda cu por ehempel tin no mas ni menos cu 7 parlamentario cu ta bin di e mundo di enseñansa y cu no a ni percura pa mehora educacion y no a preocupa pa mehora e posicion salarial di e cuerpo di docente, corda pa ponemento di airco na scolnan. Y sigur tambe nos aki’fo a haya hopi falta di e voz cu mester representa nos cuerpo di docente y cu despues di 8 aña a bolbe lanta cabes y cu lo kier contribui na mehoracion di educacion pero tambe di cuido di nos cuerpo di docentenan y nos muchanan.

 

Un dialogo serio

Mester sinta den un dialogo serio y no manera tabata e dialogo anterior unda cu gobierno a mal usa tur hende pa nan por pasa medidanan pa masacra e pueblo trahado, unda cu lo mester traha riba con lo mester percura pa pone airco y mehora e situacion di nos educadornan fisico pero tambe traha riba mehoracion di structura salarial y trece innovacion , tur na un manera sostenibel y bon planifica pa por logra esaki, sino nos lo keda mesun caminda un biaha mas.

Pa termina nos tin di traha hunto y na un manera serio y responsabel pa por logra soluciona problemanan cu e gobierno anterior a laga atras y unda cu tur e actornan tin di laga un banda nan escogencia politico y gara nos bandera di Aruba pa asina conhuntamente nos por logra mas na beneficio pa henter nos pueblo.