Home International Desde 1 di Januari 2018, pasaheronan di Avior, lo mester ta vacuna...

Desde 1 di Januari 2018, pasaheronan di Avior, lo mester ta vacuna contra keintura geel pa por drenta Aruba

SHARE

Oranjestad: Recientemente riba e Twitter Account di e Aerolinea Venezolano, Avior tin publica cu desde 1 di januari 2018, lo bay exigi vacuna contra Keintura Geel, pa tur viaheronan cu ta biniendo Aruba cu e vuelonan di Avior.Sangura cu ta transmiti e virus na Aruba ta Aedes Aegypti

Aparentemente e malesa aki lo por ta lantando cabes bek y mirando cu na Aruba nos tin e sangura Aedes Aegypti cu por transmiti e virus di gele koorts, nos mester ta mas cauteloso. Si acaso un persona drenta Aruba cu e malesa aki y e wordo pica pa un sangura Aedes Aegypti, esaki lo por pica un otro persona y asina por transmiti e virus aki facilmente, cual sigur lo bira un problema grandi pa Aruba.
Proteha un poblacion
Tin varios isla den nos region cu ta aplicando e exigencia aki caba y no lo ta nada straño cu Aruba un dia tambe lo por cuminsa exigi esaki di tur esnan cu kier drenta nos isla, saliendo for di un pais of zona caminda keintura geel ta origina. E ta un forma pa proteha un poblacion pa no wordo infecta cu e virus aki.
Na Aruba ta duna vacuna pa preveni keintura geel, na momento cu ta bay viaha pa un pais cu ta exigi e certificado di vacuna contra keintura geel, por bay tuma e vacuna aki. Semper ta bon pa un persona buska informacion prome cu viaha pa un pais, si acaso e pais ey lo por tin e exigencia aki, pa mas informacion por yama libremente Dienst Besmettelijke Ziektes (DBZ).
Keintura Geel
Keintura Geel ta un malesa viral, hemoragico, transmiti pa un sangura, e sintomanan ta keintura, dolor di cabes pisa, gelezucht (cuero y of blanco di wowo por bira geel), dolor di curpa, mareo, sacamento y cansancio.
                  
Masha poco pashent infecta cu keintura geel, sa haya sintomanan mas grave y si esaki ta e caso, aproximadamente  mitar di nan lo fayece den un lapso di 7 pa 10 dia.
E virus di Keintura Geel, ta origina di e zonanan tropical di Africa, America Central y Sur America. Ocasionalmente, esnan cu ta viaha pa e paisnan unda e virus aki ta origina por transmitie pa paisnan cu no tin e virus aki. Pa evita esaki hopi pais ta exigi un certificado di vacuna, prome cu drenta nan pais, especialmente ora e viahero ta bin di zonanan den cual e virus aki ta origina.
E virus di keintura geel ta un arbovirus cu ta di e tipo Flavivirus, cu ta wordo transmiti pa sangura di e tipo Aedes y Haemogogus.
E diferente especia di sangura, tin diferente habitat. Algun di nan criaderonan ta cerca di casnan y otro den mondi y algun den mondi y cerca di casnan.
Tratamento 
Un tratamento bon y tempran na hospital por yuda e pashent recupera y e chens di sobrevivi ta grandi. Actualmente no tin un remedi anti viral pa trata keintura geel, mas bien ta trata e patientnan pa evita dehidracion, evita cu e higra of rion por faya y trata e keintura halto. Infecionnan bacterial por wordo trata cu antibiotica.
Prevencion
E vacuna ta esun dimas importante pa preveni keintura geel, e vacuna ta pa proteha un poblacion contra un brote di e malesa aki, pesey babynan mester wordo vacuna contra esaki, tambe tur esnan cu ta viahando pa areanan unda keintura geel ta origina.
Vacuna
E vacuna pa preveni keintura geel ta hopi sigur y no ta caro, un solo dosis ta suficiente pa duna un persona proteccion pa bida largo contra e virus aki, extra dosis di e vacuna no ta necesario.
Den acuerdo cu International Health Regulations( IHR) tin para, cu paisnan tin derecho di exigi di su bishitantenan un certificado di vacuna pa preveni keintura geel. Si acaso pa rasonnan medico e bishitante no por a wordo vacuna, esaki mester wordo certifica pa autoridadnan apropia. IHR ta tratando legalmente pa stop plamamento di malesanan contagioso y otronan cu ta forma peliger pa salud di hendenan.
Con pa elimina criadero di sangura
Evita awa para rond di cas, no pone stek di mata den awa, awa colecta di yobida no lague para, of evita awa para den scoter bou potchi mata etc.
Henter aña Gele Koorts Muskiet Bestrijding (GKMB) ta bishita casnan rond di Aruba y por haya mas informacion personalmente di e miembronan di GKMB, tambe nan ta pasa controla na casnan si acaso por tin criadero di sangura cu ta transmiti virus di cualke malesa contagioso, tambe semper ta bon pa fumiga cas contra criadero di sangura.
Paisnan unda keintura geel ta origina
Paisnan di alto riesgo pa wordo contagia cu keintura geel, ta paisnan cu ta ubica den e zona tropical of sub tropical di e continente Africano y tambe di e continente Americano, Sur america y America Central.
Por ehempel Brazil, Paraguay, parcialmente Ecuador, Peru, Colombia y Venezuela etc. etc. Vacuna contra keintura geel ta wordo altamente recomenda ora di bay bishita e paisnan aki.
Na momento cu ta viaha pa un di e paisnan aki semper ta recomendabel pa tuma contacto cu DBZ, pa haya mas informacion, tocante vacuna pa preveni keintura geel.