Despues cu AVP a haya su derota aplastante den e eleccion ultimo y cu pueblo no ta kere den nan mentira y manipulacionnan mas, Marlon Sneek ta un di e poco ignorantenan cu a keda activo ainda y kier sigui plama su mentiranan den nos comunidad. Asina recientemente cu cara seco el a trece padilanti cu su partido AVP durante 8 aña no a introduci ningun medida riba lomba di pueblo. Ta increibel locual e mentiroso aki a trece padilanti ya cu e cantidad di medidanan imponi door di gobieno di AVP a surpasa tur limite, esta mas di 30 medida!
Medidanan cruel
Pa refresca Marlon Sneek su memoria lo siguiente: AVP a percura pa aumenta e primanan di AOV y AZV, a introduci BAZV, a aumenta e edad di pensioen te 65 aña (SVB y APFA), a introduci Franchise y Middelloonregeling pa e ambtenaarnan, a kita Bashi Premie y Gelijk Bedrag di pensionadonan, a aumenta Room tax, Timeshare tax, Car rental tax, Vliegtax, accijnzen, invoerrechten, inkomstenbelasting, grondbelasting, schoolgeld, collegegeld, tarifa di bus, prijs di coriente, pago pa recoge sushi y parkeer auto, a corta drasticamente den subsidio di fundacionnan social y asina por sigui menciona mas medida cruel imponi riba lomba di pueblo.
Promesanan falso
Tambe Marlon Sneek tabata tin e curashi pa lansa un otro mentira flagrante pa pueblo guli manda abao, esta cu su partido AVP nunca a haci promesa na comunidad sin cu nan no por a cumpli cu esakinan. Sinembargo e siguiente hechonan ta demostra lo contrario:
- Elimina BBO. Durante henter e campaña pa eleccion 2009, Mike Eman a priminti cu e lo elimina e BBO di 3% asina cu AVP drenta gobierno, ya cu e BBO lo a aumenta e costo di bida drasticamente. Hecho ta cu na lugar di elimina e BBO, Mike Eman a percura por medio di e BAZV pa aumenta esaki te na 3.5%. Y riba dje nan a percura pa awe e costo di bida tin henter comunidad na rand di desesperacion.
- Reduci prijs di awa y coriente. Tambe un di e mentiranan di Mike Eman den e campaña pa eleccion 2009 tabata cu ‘from day one’ nan lo reduci e tarifanan di awa y coriente cu 25.5% y den e siguiente aña lo reduci esaki cu un otro 25.5%. Sinembargo na lugar cu e tarifanan aki baha cu 51%, nan a aumenta esaki drasticamente debi na e corupcion di Hedging y cual a costa e pueblo consumidor mas di 300 miyon florin.
- Aumento di edad di pensioen. Den e programa pa eleccion 2009, AVP a trece como punto di prioridad: “Fiha e edad di pensioen pa tur hende na 60 aña”. Pero kico nos por a mira despues di algun aña? Den un forma dictatorial y sin tene cuenta cu ningun hende nan a bulldoze y aumenta e edad di pensioen te na 65 aña y awe nan ta na yoramento cu e gobierno nobo lo no por baha esaki bek te na 62 aña.
- Laptop pa tur studiante. Mirando henter e desaroyo pa loke ta digitalisacion den mundo, AVP a priminti tambe cu tur alumno y studiante na Aruba lo haya un laptop gratis pa nan por uza den nan tareanan di scol. Esaki tambe tabata un engaño total ya cu nunca e alumno y studiantenan a haya e tan afamado laptop aki for di Mike Eman.
- Elimina Boekenfonds di Colegio. Mas di e promesanan falso tabata cu AVP lo percura pa elimina e boekenfonds di Colegio Arubano. Esaki nan a declara sagradamente para dilanti di e edificio di e scol aki. Pero te cu awe tur studiante mester paga e suma completo na e fondo di buki aki.
Cu e ehempelnan di promesanan falso exponi aki tur hende por conclui cu durante e 8 aña di gobernacion di AVP, e partido aki a converti su mes den un machin di engaño y falsedad, ya cu nan no a cumpli cu ningun di e promesanan aki. Awe nan ta consisti di politiconan manera un Marlon Sneek cu diariamente tin como obhetivo di tira lodo contra partido MEP, siendo cu ta nan mes ta lastra tur dia den e lodo aki.