Home Local Di OCHO donacion di Aqua48 a bay pa Crijojo Trappers Aruba

Di OCHO donacion di Aqua48 a bay pa Crijojo Trappers Aruba

SHARE

Diahuebs 19 di october, Aqua for Aid (Aqua48) a otorga su di ocho donacion recauda cu awa bendi na restaurantnan participante. Manon Hekman di Aqua48 a entrega e donacion di 4000 florin na señora Merviné Kock  di e proyecto Crijojo Trappers Aruba. Esaki ta un proyecto pa sterilisa cachonan di caya. E donacionnan aki ta bira posibel danki na clientenan cu ta paga pa awa den glas di Aqua48 den restaurantnan participante. E siguiente donacion ta bay pa Stichting Thuiszorg Aruba. Prome cu a otorga e donacion, miembronan di prensa hunto cu representantenan di Aqua48, Old Cunuco House Restaurant, WEB y CEDE Aruba a haña un demostracion di con ta catch e cachonan di caya pa hiba sterilisa nan.

Pa e cuartal tras di lomba, e comicion cu representantenan di WEB Aruba y CEDE Aruba a scohe pa e donacion di Aqua48 bay pa Crijojo Trappers. Esaki ta un proyecto di Nisi Canis Heart of Gold Foundation cual ta ehecuta cooperacion di veterinarionan. E ta encera captura, sterilisa pushi y cacho y pone nan bek riba caya. Esaki cu e meta di yuda alivia e molester di animalnan di caya rond Aruba y na mes momento pa contribui na un solucion permanente. Crijojo Trappers ta pasa di districto pa districto y ta traha completamente a base boluntario.

Siguiente donacion pa Thuiszorg Aruba

E donacion di Aqua48 pa e siguiente cuartal lo bay pa Stichting Thuiszorg Aruba. E fundacion aki ta ofrece cuido na hende grandi y hendenan cu un limitacion fisico. Asina ta trata na preveni isolacion y soledad di hende grandi. Cu e facilidad na Yaburibari ta trata na crea un ambiente ‘di cas’ pa e hendenan grandi y duna nan e sintimento cu ainda nan ta parti di nos sociedad. Lo uza e donacion di Aqua48 pa instala un systema di zonido pa nos grandinan por goza di musica di nan tempo y por relaha den un ambiente di cas.

Aqua48, CEDE Aruba y WEB Aruba ta gradici y na mes momento ta haci un yamada na comunidad pa sigui aporta na e bon causa, bebiendo Aqua48 den e restaurantnan participante.