Home Sports Despues cu a stop Copa Antiano for di 32 aña pasa! Coca...

Despues cu a stop Copa Antiano for di 32 aña pasa! Coca Cola-Nacional lo representa Aruba den Copa ABC Na Boneiro

SHARE

ORANJESTAD, Aruba: Pa 25 aña largo a organisa e Copa Antiano di futbol, cu a inicia na 1960. E ultimo Copa Antiano tabata na 1985 y despues cu Aruba a haya su Status Aparte na 1986 no a organisa esaki mas. Algun club mes a purba di organisa Copa ABC, pero nan a stop di haci esaki y awo Arubaanse Voetbal Bond (AVB) ta purbando di organisa e ABC Cup. E aña aki lo tuma luga den luna di November e torneo di futbol di A-B-C.

E torneo aki ta un iniciativa di Presidente di AVB, Ing. Richard Dijkhoff, kende a cuminsa traha riba dje 3 aña pasa. A cuminsa traha riba e concepto aki, pasobra a ripara cu no tin nada cu ta sosode entre e islanan di Antias. Y di esey a cuminsa cu diferente combersacion cu e presidentenan di e federacionnan di Corsou y Boneiro, unda cu a purba di yega na e ABC Cup.

Pero pa motibonan organisatorio, unda cu e campeonatonan di futbol di Corsou y Boneiro no ta core paralelo cu di Aruba, esey a pone cu tabatin problema pa organisa un bon ABC Cup. Richard Dijkhoff a elabora cu e aña aki e campeonatonan ta core practicamente paralelo, unda cu Aruba y Boneiro ta core casi mes momento mientras cu Corsou a cambia nan formato. Nan a adapta nan campeonato y awo tur 3 campeonato ta core paralelo. Esaki a haci posibel y awo a nan a sinta hunto pa por organisa ABC Cup.

Na Boneiro nan ta organisa e torneo Internacional y sintando cu nan, a dicidi di probecha di e oportunidad aki pa organisa e ABC Cup entre Aruba, Boneiro y Corsou. E federacionnan a bisa cu esaki ta un inicio y tanten cu yega Boneiro cu e campeon di Aruba. Aki lo sigui amplia mas riba esaki, unda cu lo trece bek manera tabata conoce den pasado como Copa Antiano.

Pa’e futbol di Aruba competi den un competencia internacional aki tin su beneficionan y e president di AVB a expresa cu e teamnan di Aruba por midi nan mes con nan ta para den futbol entre e tres islanan. Un campeon di Aruba lo enfrenta campeon di Corsou, unda cu lo midi con e diferencianan ta, pero di otro banda esaki ta un iniciativa p’e teamnan trata di bay un bon campeonato y sali campeon di Aruba den futbol. Na momento cu e team sali campeon di Aruba, nan tin e garantia di bay hunga wega internacional, sea esaki ta na Aruba, Boneiro of Corsou. Esey tambe ta duna bek na e sacrificio y esfuerso cu hungado, coach, dirigente ta haci. Esaki ta e prome fase, asina el a elabora.

Despues di esaki ta sigui e preparacionnan, pasobra danki na e cooperacion cu CONCACAF e team di Coca-Cola Nacional lo bay ta participando den e prome kwartaal di 2018 un torneo internacional unda teamnan campeon di Caribe lo topa otro. AVB ta trahando duro pa duna bek na tur esun cu ta participa den futbol, unda cu ta duna nan algo pa asina nan por bisa cu por fin como hungado ta keda reconoci. Apart cu ta reconoce nan den un actividad manera di Futbol Aruba, awo nan ta haya reconocemento pa motibo cu AVB conhuntamente cu e partnernan manera Fundacion Lotto pa Deporte ta percura pa nan yega e torneonan aki. Pa asina nan por hunga futbol internacional y midi con nan ta para den futbol.