Home » 7 metodo pa minimalisa stress den bo bida

7 metodo pa minimalisa stress den bo bida

by Admin
0 comment 55 views

Nos tur tin stress den nos bida, y pa diferente motibo. Stress lo nunca kita por completo, pero si tin algun forma pa baha esaki. E siguiente 7 step ta algun cambio cu por wordo haci pa reduci esaki.

1.Bay drumi trempan y lanta trempan

Nos tur sa con importante e ta pa drumi suficiente. Drumiendo trempan y lanta trempan ta yuda bo cuminsa bo dia bon. Si bo maintanan ta caotico, e resto di bo dia lo tin e mesun energia. Crea espacio den bo mainta pa bo por relax y prepara pa bo dia na un forma rustig. Bo por organisa e anochi prome, pa asina haci mainta locual bo ta gusta. Por ehempel, bo por lesa, scirbi o medita. Bo por crea un habito pa bo maintanan cu ta duna bo e push pa sigui bo dia riba e bon pia.

2. Traha un lista

Cuminsa bo mainta scirbiendo un lista di locual bo tin pendiente. Esaki ta yuda bo tin un bon bista di locual bo mester haci pa e dia. Y tambe ora bo completa algun di bo tareanan, bo lo sinti satisfecho pa scrap locual ta cla. No haci e error di crea un lista mucho largo, sea realistico y nota lo esencial.

3. No preocupa pa cosnan cu bo no por controla

E ta tuma hopi energia y tempo pa sinta preocupa pa cosnan cu nos no tin control di dje. Tin momento cu preocupacion lo no cambia un situacion. Den e caso cu e situacion ta den bo control, embes di preocupa, enfoca pa haya un solucion. Ora bo duna energia na problema, e ta bira mas grandi y mas complica pa maneha. Pero desvia e energia aki pa haya un posibel solucion. Esaki lo haci locual bo ta pasando aden mas facil pa anda cune.

4. Siña bisa ‘no’

Un di e maneranan mas poderoso pa reduci stress den bo bida ta pa bisa ‘no’ na algun di e cosnan cu bo no kier haci. Si bo ta haya bo mes ta bisa ‘si’ paso bo no kier un otro persona sinti ‘malo’ o paso bo ta sinti obliga pa haci cierto cos, purba di reevalua e tipo di pensamento aki. Hopi vez e presion aki cu nos ta pone riba nos mes por causa hopi stress innecesariamente. Ora cu bo siña bisa no pa cierto cosnan, e lo crea mas espacio pa bo haci e cosnan cu di berdad bo kier haci.

5. Limita distraccion

Tuma un momento pa analisa con bo ta pasa bo siman y si tin distraccionan presente (p.e. Facebook). Distraccion por ta necesario tin ora, por ehempel pasando tempo ta chat cu amigo/a den Whatsapp group chat por ta pret. Pero tin momento cu nos mester pone distraccion un banda pa asina haci locual ta importante y cu lo yuda bo logra bo metanan. Identifica e elementonan cu ta distrai bo y purba di baha man pa esaki.

6. Come saludabel

Comiendo malo por hacie dificil pa bo curpa adapta na stress. Comiendo un variacion di cuminda gezond por duna bo e ‘fuel’ cu bo mester pa e dia. Purba di incorpora mas fruta, berdura y proteina den bo dieta. Corda tambe di bebe hopi awa, e ta un elemento cu por yuda bo cu e energia cu bo mester. Tambe awa ta sumamente importante pa e funcionamento di bo curpa. Aunke por ta dificil, evita junk food y cuminda procesa.

7. Sea agradecido

Un di e maneranan mas facil pa elimina stress ta pa ta agradecido di tur e oportunidadnan y experiencianan den bo bida. Na final di caba dia, hacie un habito pa reflexiona riba locual bo tin pa ta agradecido pe. Por ta bo por purba di puntra bo mes ‘Kico ta e miho cos cu a paso cu mi awe?’. E ta un pregunta cu na fin di dia, cu bo ta comiendo na mesa cu bo pareha o famia, bo por puntranan. Y asina comparti e mensahe cu aunke tin dia cu ta trece cosnan dificil, e ta importante pa mira e cosnan cu ta bon tambe.

Esakinan tawata e 7 puntonan pa reduci stress. Stress ta parti di bida, pero e no mester domina nos bida.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio