ORANJESTAD, Aruba: E aña aki e banda One of A Kind, 1OAK, a lanta y nan ta cla pa deleita tur hende cu nan canticanan unico. Abo kier sa ken nan ta? Awel awo bo tin e oportunidad di poco, poco pa haya sa ken ta e frontline di e banda. Un di e cantantenan ta Rayner R.Y. Sprott, cu ta un hoben di 20 aña.
Rayner Sprott su stimacion na canto y musica ta bin danki na su tata, kende ta un legendario cu un carera extenso y exitoso como musico y cantante riba nos Isla, esta Reynaldo “ Mighty Rusty “ Sprott. Di chikito e tabata mira su tata como un role model y sin duda ainda e ta pa su persona. “Mi no por laga afo e parti cu baile tambe ta un parti esencial den locual mi gusta haci. E combinacion perfecto”, asina el a expresa. E prome experiencia riba escenario di Rayner Sprott tabata cu su 8 aña di edad na momento cu el a participa den un Calypso & Roadmarch Contest. Esaki tabata algo inolvidabel, pasobra aki el a haya su confirmacion di su vocacion y pasion. For di e momento ey e tabata sa cu su carera como cantante a inicia y di eynan e no a para mas. El a forma parti di e contest di cual e ta orguyoso di e inicio ey. Cu su 14 aña el a tuma un break pa asina duna chens pa su bos desaroya, pa asina ey sigura y forma un base solido como artista. Tempo e tabata mucha el a presenta na varios ocasion den Cas di Cultura como tambe riba e Barco Free Winds.
Na edad di 17 aña el a join e banda di su tata, unda nan tabata presenta den Casino na Riu Palace Aruba. Asina aki un biaha mas el a cuminsa gana su experiencia como un hoben adulto pa sigui cu e vocacion aki. “Naturalmente como artista e parti cu semper ta e reto principal ta e publico cu bo tin cu enfrenta. Y akinan e conseho y conocemento di mi tata semper tabata t’ey presente, pa asina yuda mi surpasa cualkier nervio y asina forma e artista Rayner”, el a splica. Ta importante pa cada artista haya su propio estilo y ta comodo cu su mes y den dominio di su publico, pa asina e por duna su miho presentacion.
Presentacionnan cu su tata na hotel a bira menos, pasobra un otro oportunidad tabata na caminda. Na aña 2016 bou guia y liderazgo di mi tata un biaha mas nan a haci un cambio chikito. Nan a bay forma parti di e banda “4Real”. E banda aki tabata presenta unicamente den temporada di Carnaval cu despues di algun tempo a disolve amicalmente.
Cu su 19 aña el a bolbe forma parti full time hunto cu su tata Mighty Rusty den e banda na Hotel Riu Palace di cual e ta forma parti di e cantantenan principal pa mas di 1 aña caba. Jurrick Salomon a acerca Rayner Sprott cu e proposicion pa forma parti di un banda nobo pa Aruba. “Esaki a tuma mi algun tempo pa yega na un decision. Pero na momento cu mi a tum’e, mi mester bisa cu e ta un escogencia bon haci”, el a expresa contento. E banda aki lo trece diversificacion/animacion diferente y di cual e ta contento di por forma parti di dje. 1OAK “One of a Kind” ta e banda cu pronto bo lo por mira y scucha Rayner Sprott cun’e. “Desde awo un danki grandi na Aruba pa ricibi nos man habri y cu tanto entusiasmo”.