E di dos obra cu Tanto Cuenta lo presenta dia 22 di october benidero lo ta Shinishi sushi, cu ta e obra traduci y adapta for di Assepoester of ainda mas conoci bou di e muchanan como Cinderella. E storia aki tambe ta data for di siglonan pasa y cual version mas conoci ta esun adapta pa e rumannan van Grimm.
E directora y traductora Desiree Correa a duna e storia un toke crioyo adaptando e titulo pa Shinishi Sushi, pero manteniendo e contenido mescos cu e storia original. Den Shinishi Sushi, cu ta alabes nomber di e pesonahe principal, tin un madrasa cu ta inclina pa duna su dos yiu muhenan tur loke nan ta anhela, mientras Shinishi Sushi tin cu haci tur tarea di cas. Maske Shinishi Sushi su bida no ta facil y ta haya hopi mal trato na e paleis di su tata, e ta haya su manera pa busca su felicidad y pa e storia tin un final felis.
Entrenamento di un obra no tur biaha ta bay mescos. Cada obra riba su mes ta exigi concentracion pa desplega tur e disciplinanan di dramatisacion manera lenguahe corporal, structura expresivo y comunicacion interpersonal. E elenco di Tanto Cuenta ta preparando su mes pa e presentacion di e tres obranan di Cuenta di Hada, pa medio di multipel ensayo y ripiticion di e escenanan.
Fantasia, magia y color no ta e unico elementonan cu ta defini un Cuenta di Hada. Simplemente disfruta di un anochi yena cu recuerdonan di un niñes, cu alabes tin un balor integro, tanto moral como literario den educacion di e chikitinnan, ta locual a motiva Tanto Cuenta bou auspicio di UNOCA, pa bin un biaha mas cu ripiticion di e tres Cuentanan di Hada na Cas di Cultura.
Esaki por lo pronto lo ta e ultimo presentacion di Tanto Cuenta na Cas di Cultura. No perde chens di biba momentonan di aventura, suspenso y hari bariga yen.
Carchinan ta na benta na Van Dorp/De Wit, Plaza Bookshop, Bruna, Dyon Center, House of Cakes, Cas di Cultura y na oficina di Bon Nochi Drumi Dushi.