ORANJESTAD, Aruba: Diabierna 13 di October e campeonato di futbol division honor 2017-18 a inicia den Compleho Deportivo Guillermo Trinidad. Na final di anochi e team di Solito, RCA, a piki e prome 3 punto y e perdida aki ta pone presion riba Caiquetio pa nan siguiente wega. E wega a termina cu e score di 3-0 pa SV RCA.
Desde comienso di wega Caiquetio a bay den defensa unda cu no tabata laga RCA yega facil e area di gol, pero e team di Solito na rindi y na diferente momento tabata tira riba gol. Di otro banda Caiquetio tambe tabata tira gol y na 2 ocasion a haya oportunidad pa anota gol di trempan pero no a probecha di esaki. Na di 43 minuut di tempo Ronald Gomez di RCA a anota e prome gol pa asina habri e marcado. Na diferente momento Keeper di Caiquetio Jorick Mackay a scapa hopi gol, mientras cu e delanteronan no tabata rindi y tabata keda ataca. E prome tempo a bay aden cu RCA ganando 1-0.
Den e di dos tempo ambos team a sigui pone presion, pero Dwight Feliciano di Caiquetio ta slight laat y a benta Glenbert Croes di RCA abou den area di gol. Referee a duna y Jeanluc Bergen ta cobra e tiro di pinalti na 73 minuut. Keeper Jorick Mackay a prepara su mes pero a bula otro banda y esaki a pone cu e di 2 gol ta cay pa RCA. Na di 87 minuut di wega Kevin Revelo di RCA a haya e oportunidad pa anota e di 3 gol, kende a ricibi un pase di Ronald Gomez.
Coach di RCA Joy Rosa a splica cu nan a enfoca pa bay cu e 3 punto den e prome wega, pasobra nan kier sigui acumula mas punto den e proximo weganan. Despues di e victoria aki un biaha mas RCA ta bay prepara nan mes pa nan siguiente contrincante cu ta Juventud Tanki Leendert cual wega lo ta diasabra pa 8:00PM. Loke ta importante ta pa acumula puntonan pa asina clasifica y RCA ta enfoca pa haci esaki.
Regilio Kartoredjo coach di Caiquetio a indica cu e no a spera menos di RCA, pero den e prome 40 minuut di wega esaki tabata 0-0. RCA a bay ariba y despues a haya un pinalti, cual a pone cu e hungadonan di Caiquetio a cay un tiki atras. Awo nan ta atras y esaki ta pone cu nan lo bay traha riba nan punto. E coach ta kere cu trahando pa mehora e punto aki p’e siguiente wega nan lo ta mas miho.