A organisa seminario hunto cu PWC y University of South Carolina
ORANJESTAD, Aruba: Un par di luna pasa Fundacion Lotto pa Deporte a organisa diferente sesion di Leadership hunto cu Price Waterhouse Coopers y Universidad di South Carolina. A cuminsa cu e “Situational Leadership”, “Challenge Leadership”, “Authentic & Emotional Leadership” y awo e seminario “How to build a sport community”. Profesor dr. Bob Heere tabata e orador principal durante e seminario aki. E ta un experto riba tereno di ‘sport management’.
Esaki tabata e di 5 seminario cu PWC ta organisa y falta 1 mas, cu un biaha mas FLpD lo participa hunto cu diferente instancia di deporte, esta e “Master class Leadership” y lo ta dia 2 di November proximo.
Mr. Di-Stefano Wernet RA, Presidente di Fundacion Lotto pa Deporte a splica cu Bob Heere ta traha na Universidad di South Carolina. E seminario tabata un exito, participantenan a ricibi informacionnan vital con pa crea un comunidad di deporte y ki aspectonan mester tene cuenta cun’e. Presidente di e fundacion tabata contento cu e seminario, pasobra e tabata uno exito. No tur hende a haci uzo di e oportunidad aki pa participa y esaki Di-Stefano Wernet a haya ta un lastima.
Director di PWC Aruba, Ruben Goedhoop, a indica cu algun luna pasa nan a drenta den un partnership cu FLpD, Universidad di South Carolina y Nyenrode Business University, unda cu nan a ofrece un programa di leadership p’e comunidad di deporte na Aruba. E proyecto aki PWC ta balora hopi, pa motibo cu directamente ta inverti den comunidad. No ta mira hopi un organisacion manera Lotto cu ta inverti no solamente den infrastructura pero tambe den contenido, den motivacion, den inspiracion pa hendenan. Na final di dia hendenan ta determina hopi con na final di dia e deportistanan ta funciona riba veld, asina Ruben Goedhoop a indica.
Stichting Sportsubsidie Aruba tambe tabata presente na e seminario aki y Josephina Maduro a indica cu e seminario aki y e otronan tambe ta hopi importante y interesante. E deseo ta pa si por haci esaki p’e federacionnan, unda cu e directivanan di e federacionnan por bin tende e puntonan cu Sportsubsidie ta boga. Loke nan ta boga p’e ta e desaroyo di deporte y pa cuminsa na chikito. Pero tambe cu biahamento no ta importante, pero ta importante pa tin curso pa uno desaroya su directiva, coachnan.
Engelbrecht Global Consulting tabata presente na e seminario di “How to build a sport community”, unda cu e director Gregory Engelbrecht a haya esaki uno hopi interesante. E temanan trata ta yuda un organisacion cu kier traha cu deporte, cu kier haci’e parti di un funcion social tambe na un pais, esaki tabata puntonan cu mester tin di dje. E orador a comparti su experiencianan na Merca, Hulanda, New Zeeland y diferente caminda cu el a traha, unda el a splica riba e bond den e comunidad y un deporte.
Profesor Bob Heere di Universidad di South Carolina tabata e orador di e seminario y el a papia riba diferente topico. E interactuacion entre e orador y participantenan a bay bon. E presentacion di e orador tabata riba nivel academico y el a papia riba diferente puntonan cu tin di haber cu comunidad y deporte. Durante e seminario e participantenan a haci hopi pregunta y esaki a pone cu tabatin hopi discusion riba e topiconan. A papia riba e lidernan mes y kico nan por haci pa crea e elementonan crucial p’e comunidad.
Fundacion Lotto pa Deporte a gradici tur esunnan cu tabata presente y tambe Minister di Deporte pa su aportacion y sosten pa cu e proyecto aki. Fundacion Lotto pa Deporte ta contento cu e yudansa di Price Waterhouse Cooper, pasobra nan a yuda bon cu e proyecto aki. Tambe a gradici Universidad di South Carolina p’e yudansa cu 2 profesor, kendenan a yuda y ta kere den liderazgo. “Leadership no ta solamente continuidad, pero e ta mira pa futuro y nos a pone fondo”, asina Di-Stefano a indica.