Nos meta ta pa brinda Aruba un gobierno stabiel
Dialuna, den edificio di APA, a inicia e reunionnan di formacion di e proximo gobierno di nos pais entre e tres partidonan. Lidernan di tur tres partido y nan conseheronan y miembronan di comision tawata presente pa asina duna inicio na e negociacionnan cu lo tuma luga pa asina pronto Aruba conoce un gobierno di coalicion manera pueblo a pidi p’e.
Lider di Partido MEP, sra Evelyn Wever-Croes, kende tambe ta Formador di gobierno nobo ta amplia riba e procedura di formacion di gobierno como lo siguiente:
“Diahuebs ultimo, mi a ricibi e encargo di Formador for di Gobernador y den cuadro di esaki nos lo bay cuminsa cu diferente reunionnan. Mi a haya instruccion pa purba forma un gobierno di coalicion entre partidonan MEP, POR y RED.
Den e ultimo dianan desde cu Gobernador a nombra mi como Formador, tin basta rumornan y speculacionnan ta circula di diferente aspectonan di formacion. Ta asina cu te hasta e gobierno a wordo forma caba cu varios diferente minister. Sinembargo, tur esakinan no ta corecto y ta completamente falso. Awe nos ta bay cuminsa. Y e procedura ta bay tuma luga den e siguiente fasenan:
Acuerdo di Formacion: Esaki ta e combersacionnan tocante e puntonan den lineanan general pa yega na un programa di gobernacion.
Programa di gobernacion: Despues cu nos tin e Acuerdo di Formacion defini, nos lo bay na e programa di gobernacion. Tur e puntonan cu partidonan a bay campaña cu n’e, ta wordo descuti pa asina cada vision wordo inclui den nos programa di gobernacion. Ta importante pa tuma tempo pa descuti tur e puntonan aki pa asina nos por yega na palabracionnan concreto pa brinda pueblo un gobierno stabiel.
Reparticion di Carteranan: Una bes cu nos yega na e fase aki, Partidonan ta bay bek den nan seno pa palabracionnan kende lo bira candidatonan pa minister cu lo representa nan partido pa eherce e diferente funcionnan.
Proceso di Screening: Candidatonan apunta pa bira minister lo pasa un proceso di screening. Una bes cu e resultado di screening drenta, nos lo entrega e reportahe na Gobernador, cu e deseo di a forma un gobierno cu un base amplio manera Gobernador a pidi.”
Sra Wever-Croes ta sigui bisa cu no solamente el a haya encargo pa forma e proximo gobierno sino tambe pa reuni cu diferente instancianan na Aruba, gremio, departamento di gobierno, sector priva y instancianan social y caritativo. Nos lo bay tene cuenta cu esnan cu ya caba a reuni cu informador y lo invita e otronan durante e simannan aki.
“Ta bay ta dos trayectoria pareu cu lo tuma luga den e dianan aki, ambos sin duda lo bay ta hopi pisa, pero atencion principal ta pa forma e gobierno.”
Sra Wever-Croes ta conclui bisando cu lo tene prensa informa lo maximo posibel di e procedura di formacion di gobierno nobo. Alabes e ta pidi pa prensa duna espacio y trankilidad pa yega na un bon acuerdo. Y ta priminti cu manera tin algo di informa, lo yama prensa pa asina pueblo tambe keda bon informa di henter e procedura.