Den e edicion di awe Bon Nochi Drumi Dushi kier laga boso cera conoci cu e prome storia, cu lo presenta den Cas di Cultura dia 22 di october benidero, cu ta un clasico conoci pa hopi hende. E cuenta Drumi dushi ta traduci y adapta for di e storia original Doornroosje.
E storia mes ta un storia crea den siglonan pasa y a conoce varios cambio cu tempo. E prome storia tabata uno Frances publica na 1340. E contenido di storia mas reconocibel na esun cu nos conoce awendia ta uno publica na 1812 pa e rumannan Grimm.
E storia cu Tanto Cuenta ta presenta ta conta di un prinses cu na ora di nacemento a haya un hechizo di un bruha malbado, cu ta encera cu ora e prinses cumpli 18 aña un hangua lo hinc’e y esey lo pon’e drumi pa largo. Ta solamente un sunchi di un prins por kibra e hechizo. Pa motibo di un biahe, e rey ta encarga su yiu na tres Ada Madrina, cu tin cu cuid’e pa niun hangua no hink’e. Pero pa un descuido e bruha Bruha ta gaña Aurora, e prinses cu e por tatua un pintura bunita riba su lomba y ta hinc’e cu e hangua y pone’e drumi pa largo. Ta un prins jaagdo, cu tabata pasando den e mondi banda di e kasteel ta bin y duna e prinses un sunchi pa lant’e for di e hechizo cu e tabata aden.
Den siglonan pasa e storia Doornroosje no tabata conoce un bruha, pero na aña 1981 a incorpora e figura di e Ada Madrina mal hende den forma di un bruha malbado aden. Fuera di e prinses, e bruha tin un rol escencial den e storia, pa motibo cu e ta esun cu ta trece un buelta den e liña di e storia y ta duna suspenso na prome luga, ora cu e duna e prinses e hangua pa pon’e drumi un soño casi eterno.
Desiree Correa, traductor y directora di e elenco di Tanto Cuenta, ta adapta e contenido di e storia Doornroosje na un forma dibertido y crioyo, cu ta pas cu nos cultura y ta dun’e asina un toke mas reconocibel pa e publico. E storia ta haya e nomber di Drumi Dushi, cu alaves ta e tema principal di e storia tambe.
Tanto Cuenta ta invita e publico amante di Cuentanan di Hada pa cumpra boso carchi, pa e ultimo funcion di 3 Cuenta di Hada, riba 22 di october, di 4or pa 6.30pm na Cas di cultura, pasobra no a sobra mucho carchi mas y por lo pronto esaki ta e ultimo funcion. Carchinan ta obtenibel pa Afls. 15,00 na Van Dorp/De Wit, Plaza Bookshop, Bruna, Dyon Center, House of Cakes, Cas di Cultura y na oficina di Bon Nochi Drumi Dushi.