Caya G.F. “Betico Croes”, Oranjestad: Diasabra pa mas o menos 10’or di anochi. Un homber ta pidi pa presencia di polis den Caya Betico Croes, paso su yiu homber ta sufri di rabia, e ta hopi agresivo, te cu ela pasa su man door un glas y a keda herida. Segun e tata su yiu no ta bou di influencia, djes cu e ta sufri di rabia.
Na yegada, mirando e comportacion di e hoben, polis a constata cu algo otro lo por ta pasando cu e hoben. Probablemente nan a pensa cu e hoben di 19 aña aki lo por a dal un tipo di droga cu ta den circulacion na Aruba actualmente.
E hoben no kier a rasona cu polis, mesora polis a pidi pa presencia di ambulance, pa por duna e hoben aki un of otro calmante y pa nan trata e corta na su man, cu tabata sangrando bastante.
Mientras nan tabata wardando riba ambulance, un señora ta yega na e sitio, aparentemente lo por ta trata di su mama. E señora ta papia cune y e hoben manera ela tende e stem di e señora, ela calma y a cana bay cu e señora na su auto, ambulance a keda cancela.
Despues di un rato cu e hoben a calma, e señora a bay hunto cu e hoben den e transportwagen di polis polie, pa asina e hoben por a ricibi tratamento medico.