Oranjestad: Diadomingo pa mas o menos 8’or y mey di mainta ta presencia di polis ta wordo rekeri na e crusada Emmastraat y John G. Emanstraat pa un accidente cu na prome instante tabata mustra basta serio, Entre un bus y un Toyota Tercel, cu hende pega den auto.
Mesora manda polis, ambulance y brandweer na e sitio. Materialwagen di brandweer ta yega prome na e sitio, pero no mester a haci uso di niun equipo, paso cu un poco esfuerso nan a logra habri e porta, pa asina e personal di ambulance por a atende cu e dama facilmente.
Na e sitio nan ta bin compronde cu e chauffeur di e Tercel tabata bayendo direccion zuid y na e crusada no a duna e bus di Arubus preferencia y a dal den banda di e bus. E impacto tabata hopi fuerte cu ela manda e Tercel bay para te riba e tereno bashi banda di e crusada. E Tercel a haya hopi daño material y tambe e bus a haya basta daño na banda.
Den e Toyota Tercel tabata tin dos ocupante mas, pero nan no tabata tin mester atencion medico, solamente e dama a keda levemente herida y a wordo transporta cu ambulance pa Hospital.