Home » ROSABELLE ILLES DURANTE CRUISE SYMPOSIUM ARUBA: “DOOR DI INCORPORA E MANERA DI ‘STORY TELLING’ DEN TOUR, BO POR ENGRANDECE E EXPERIENCIA NA E TURISTA”

ROSABELLE ILLES DURANTE CRUISE SYMPOSIUM ARUBA: “DOOR DI INCORPORA E MANERA DI ‘STORY TELLING’ DEN TOUR, BO POR ENGRANDECE E EXPERIENCIA NA E TURISTA”

by Admin
0 comment 48 views

ORANJESTAD – Diahuebs ultimo Aruba Tourism Authority (A.T.A.), a tene su di tres Cruise Symposium, un evento cu tur aña ta trece socionan di e turismo crucero hunto pa pasa riba resultadonan, pero tambe pa busca manera di mehora Aruba como destino crucero. Den cuadro di esaki, A.T.A. a invita Rosabelle Illes pa duna un presentacion riba e importancia di e asina yama ‘Story Telling’ cual ta wordo duna door di esnan trahando directamente cu nos bishitantenan. E topico aki a continua parti atardi cu workshop caminda operadornan y guianan di tour a participa pa conoce otro manera con nan por diferencia di nan competencia y na mesun momento, brinda e turista un experiencia memorabel.

Pa prepara e tarea aki, Illes a bishita y participa den diferente tour cu ta wordo ofreci na e turistanan riba nos isla y for di e angulo di e turista, a mira kico ta wordo bisa na cada stop pero tambe e manera cu esaki ta wordo comunica. A base di esey, a logra identifica diferente elementonan adicional cu por incorpora y a bin cu un formula cu el a comparti cu e participantenan. E idea ta cu “bo no ta solamente hib’e (e turista) na un sitio bah’e y cont’e e historia, pero hacie na un manera cu e turista ta bay keda cord’e y ta crea un experiencia,” Illes a comenta.

E audiencia cu a participa na esaki durante e Cruise Symposium a wordo stimula pa amplia nan perspectiva pa cu esaki, hopi no tawata consciente prome riba e aspecto aki di nan negoshi. Asina a cuminsa un dialogo caminda varios compania a acerca Illes pa haci un sesion priva y personalisa, algo cu e poeta y escritor ta entusiasma pa haci. Illes a laga sa cu “Nos ta sigui traha hunto pa asina sigui conta e storia di Aruba y sigui promove Aruba na un manera cu nos ta orguyoso di dje.”
Illes ta califica e iniciativa di A.T.A. pa organisa e evento y workshop como uno hopi bon. Apesar cu a registra 96% di satisfaccion bou di e turistanan crucero cu ta bishita Aruba, no mester sinti comodo, ni para keto. Ta bon pa keda wak constantemente con pa mehora. Story Telling ta un manera hopi creativo cu a keda comproba den exterior di por haci un diferencia. “Mi ta contento cu nos ta tumando esaki na serio y nos ta bay traha riba dje pa sigui incorpora Story Telling den tur loke nos ta haci,” Illes a remarca.

Ta bon pa cada tour operator puntra su mes si e ta dunando e producto corecto cu e cliente ta buscando y con e por diferencia den su competencia. Di e mesun manera, A.T.A. ta busca pa mehora y laga nos destinacion destaca di e otro islanan den Caribe. Tour operators por pensa den direccion di varia nan ruta cu stopnan diferente, cambia e nomber di e producto of añadi un toke unico na e experiencia. “Si tur bay wak esey internamente, e ora ey nos por tin diferente experiencia cu e turista mes ta scoge cua di nan e ta gusta. No tur turista ta mescos, p’esey mester wak kico ta bo DNA, kico ta bo identidad, kico abo ta trece nobo riba mesa,” asina Rosabelle Illes a finalisa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio