Lider di partido POR sr. Otmar Oduber a reuni cu sr. Gobernador dialuna atardi unda cu a repasa e trabounan cu sr. Informador a haci durante transcurso di siman pasa y cual rapport el entrega diabierna. Aworaki e ta reuniendo cu lidernan pa den e siman aki logra nombra un formador. Unabes cu esaki tuma luga, e ora ey lo por mira tambe e disponibilidad cu tin tambe entre e partidonan pa por forma un gobierno y asina asumi e retonan y responsabilidadnan cu nos tin nos dilanti.
Te cu aworaki e partido cu ta exclui for di e formacion di e proximo gobierno ta partido AVP, pues partido MEP, POR y RED lo mester bay sinta na mesa hunto cu formador unabes cu formador wordo identifica y wordo presenta pa sr. Gobernador.
Sr. Oduber ta splica cu e base ta pa tin un gobierno di sigur minimo 11 asiento entre partido MEP y POR y amplia esaki mas cu ta posibel unda cu partido RED a mustra disponibilidad. ‘Nos a mustra riba e hecho cu tin puntonan cu tincu papia riba dje y puntonan di principio cu nos partido ta para riba dje y cu nos mandato cu tin den ‘Partijraad’ ta condiciona na cierto puntonan. Den nos programa nos a pone atencion na varios punto cu a bin dilanti mediante encuesta y encuentronan cu instancianan ya for di comienso di aña (e puntonan aki no a cambia y a keda prioridad). Pa nos como partido e ta prioridad tambe den formacion di un gobierno. Mi ta convenci cu si mira programa cu tin di partido MEP y den cierto forma di partido RED, ta mira cu ta habri pa papia y combersa riba temanan di importancia pa comunidad. Mester bisa cu no a yega e fase di reparticion di carteranan ainda. Aworaki e prioridad ta pa prome, sr. Gobernador nombra un formador. Despues di esaki e siguiente paso logico, lo ta pa mira similaridadnan entre e dos of tres partidonan y mira si por forma un plan di gobernacion na nivel Nacional. Di e forma ey por ‘baha bandera di partido’ y pone puntonan di prioridad di comunidad dilanti. E ora e ta bira un programa combina di gobernacion pa tur hende cu ta biba riba e baranca aki. E plan di gobernacion mester ta na beneficio di tur hende riba nos isla.
Concluyendo sr. Oduber a splica cu unabes e pasonan menciona tuma luga, ta mira ken ta e miho actornan e ora pa atende cu e diferente carteranan. Sigur ta mira ‘schommelmento’ cu lo mester bay tuma luga, pasobra nos a bisa cu nos lo no mantene e 9 ministerionan y pues enfasis ta bay cay riba carteranan nobo.