Home » DURANTE CRUISE SYMPOSIUM A WORDO PRESENTA MASTER PLAN PA WAF ORANJESTAD TA IMPORTANTE PA FUTURO DI TURISMO CRUCERO

DURANTE CRUISE SYMPOSIUM A WORDO PRESENTA MASTER PLAN PA WAF ORANJESTAD TA IMPORTANTE PA FUTURO DI TURISMO CRUCERO

by Admin
0 comment 56 views

ORANJESTAD – E master plan pa desaroyo nobo riba e tereno di waf na Oranjestad ta trahando hunto cu otro proyectonan den cercania pa asina alcansa un harmonia den henter e waterfront di nos ciudad capital. Detayenan preliminario di e proyecto a keda presenta diahuebs ultimo durante e Cruise Symposium Aruba, un evento cu Aruba Tourism Authority a organisa pa informa y educa stakeholders den e industria di turismo crucero.

Lex de Ridder, Chief Commercial Officer di Aruba Ports Authority, tabatin e presentacion na su encargo y a duna di conoce cu den e proximo dos luna, lo trece dilanti e propuesta completo na esnan concerni y publico en general. Teniendo na cuenta aspectonan importante manera kico ta loke producto Aruba tin mester y por sostene, ta buscando e mezcla corecto pa trece un dinamica nobo na e area.

Ta trata di 20 hectarea di tereno, di cual ta propone pa 40% ta destina como parke y areanan berde, 10% ta espacio publico pa cana, sinta y move y 50% lo ta propiedad inmobiliario cu diferente uzo. E ultimo aki lo mester sigui guidelines stipula dor di Aruba Ports Authority cu ta dicta grandura y estilo, entre otro. De Ridder a splica tambe cu a acerca esnan encarga cu proyecto di Bushiri Beach y cu e propietario nobo di MarAzul pa yega na un cooperacion cu lo maximalisa e atractivo di e waf di Oranjestad pa e industria crucero.

De Ridder a papia den su presentacion tambe riba e importancia di keda ‘on track’ den e proyecto cu lo tuma entre 10 pa 15 aña pa keda completa. “Na prome luga ta importante pa bin cu un plan pa sa unda bo ta bay, pero tambe cu bo ta desaroya e hermentnan cu otro desaroyadornan mester sigui pa keda riba mesun liña,” asina e ehecutivo a splica. “Nos ta trahando riba tur esey pa tin un ehecucion responsabel cu Gobierno y APA por dirigi, cual ta hopi importante den henter e maneho.”

Aruba Tourism Authority tambe ta forma parti di e socionan cu APA ta traha di cerca cu n’e pa asina inclui e vision cu tin pa Aruba mantene su mes como un di e destinonan mas gusta den Caribe pa e liñanan di crucero y haci e experiencia pa e turista, uno cada bes mas agradabel y unico. Aruba Cruise Symposium ta un evento anual cu ta conta cu e participacion di autoridad, tour operators, tour guides y vendors cu ta forma parti di e industria di turismo crucero riba nos isla.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio