ORANJESTAD – Den un conferencia di prensa di Gobierno diahuebs mainta Minister demisionario di Infrastructura Benny Sevinger, kende entre otro a papia di e dealnan cu a wordo traha prome cu eleccion
Sevinger a splica cu ta masha importante como partido cu a gana eleccion nan sigui informa comunidad loke ta pasando. Asina el a cuminsa pa bisa cu p.e. e dealnan aki a keda ilustra den e reaccionnan inmediatamente despues di eleccion unda cu tanto lider di POR como di MEP a sali bisa cu no ta bay traha cu AVP. Asina a keda confirma tambe e rumornan cu comerciantenan a sera e deal aki prome cu eleccion. “Esey ta importante pa pueblo realisa. Algun minuut despues di resultado tur dos ta confirma e expresion aki y algun dia despues por a nota cu reunion di accionista a y ta tumando luga. Comerciantenan ta sinta na mesa pa wak con “e accionnan” ta bay wordo parti. Esey ta e realidad cu nos mester biba cu ne”.
E minister demisionario a bisa cu e situacion actualmente na Aruba, el a enfatisa esaki ta 100 biaha miho di loke nan a hay’e na 2009, den e prome Gobernacion di AVP. Pesey e ta bisa cu e declaracionnan di e dianan aki ta e modus operandi di partido MEP cu ta bisa cu pa nan bay Goberna mester tuma medida y ta pinta e situacion scur. “No tin otro solucion pa e partido aki. Nos a kere cu e generacion nobo tin mas creatividad pa crea solucionnan pasobra reto den Gobierno semper tin, pero si bo unica arma ta introduci medida, y pa logra haci esaki ta papia di crea comision pa mira e situacion financiero, a cuminsa pint’e malo pa bay tuma medida. Pero nos ta bisa for di awo caba cu lo no permiti esaki. ”
Sevinger a splica cu ora a drenta Gobierno na 2009 e situacion tabata dramatico, cu un turismo te na suela, cu un SVb, AZV y APFA den bancarota. Tarifa di awa y coriente sutando pueblo y refineria sera. Pero tambe un finanza publico cu apenas por a paga salario di e trahadonan. “Tur esaki nos a bin haya na 2009 y nos no a busca ningun comision pa bin bisa nos cu e situacion ta malo. Ta tristo pa mira, Sevinger a bisa, cu MEP a campaña pa pueblo dun’e stuurwiel pa guia e pais aki y awor cu a haye kier busca un commision pa yuda nan.
Tempo cu AVP a drenta Gobierno na 2009 a traha cu e plataforma Dialogo Nacional den cual a sinta cu tur gremio, instancia y expertonan local pa studia e situacion y cu a confirma loke e partido tabata sa caba. A traha riba loke a priminti durante e 8 anjanan di gobernacion, y a haci esaki cu e gremionnan. Hunto cu nan a drecha e situacion di SVb, AZV y APFA. Pesey el a bisa cu nan di AVP lo no permiti cu promesanan haci door di MEP den campaña ta hala atras riba nan cu e pretexto cu e situacion ta malo. E flie ey no ta subi, Sevinger a bisa. Lo no permiti pa corta den loke a wordo otorga caba na ciudadanonan.
Pueblo no ta kens y por mira e cambionan e.o. den Infrastructura di Green Corridor y Watty Vos Blvd, renobacion y ampliacion di hospital, creando un situacion diferente cu na 2009. Awe tin un stabilidad cu no ta bay logra den un Gobierno instabil di coalicion, cu no por ser logra cu un persona, lider di POR, cu tabata corta pia di stul di su coleganan ora cu e tabata Minister. “Esaki ta bay ta un Gobierno instabil cu hopi problema den Conseho di Minister y den Parlamento.”Sevinger a bisa finalmente cu na salida lo entrega documento di loke a wordo haci y kico ta pendiente.