ORANJESTAD, Aruba: “E aña aki por spera hopi di e team di S.V. Estrella”, asina Arturo Charles, coach di SV Estrella a indica. Nan meta p’e prome parti di e campeonato ta pa ta den e prome 4 ekiponan y despues sigui pa clasifica p’e play-off. Manera ta conoci, e campeonato di Dvision di Honor di Arubaanse Voetbal Bond ta ranca sali diabierna awor dia 13 di october. E prome buelta lo sigui te cu december, cu weganan riba diabierna, diasabra y diadomingo.
Durante un training di SV Estrella, e coach a splica nos cu tin hungadonan cu a bay, mientras tin otronan cu a join e team. Esaki ta e dinamica di futbol, pasobra tur aña despues di e campeonato, hungadonan tin oportunidad di cambia di team, basa riba nan mesun escogencia y decision.
Siman pasa a tuma nota di un encuentro amistoso entre SV Estrella y SV Britannia den cuadro di preparacion y anticipacion di e campeonato di futbol cu apenas ta bay cuminsa. E entrenador di e ekipo Hoofdklas di SV Estrella a conseha tur otro ekipo y nan hungadonan pa nan train duro, prepara nan mes fisicamente como tambe mentalmente, pasobra por ta sigur cu SV Estrella ta bin “todo por todo”.
Tocante SV Estrella
A funda SV Estrella dia 1 di september 1948. E ekipo a sa di crece den e ultimo 69 añanan te bira un organisacion di 183 futbolista. Nan ta parti entre futbolistanan di 4 aña te cu 40 aña di edad, cu ta inclui division di damas, liga hubenil, menor, mayor y junioren, hoofdklas y veterano. Den LIFIDA nan ta participa den Mini Baby, Baby, Lifida A y B.
Gilbert Raven ta Presidente di e organisacion, mientras cu Arturo Charles ta coach di e ekipo di 25 futbolista cu ta hunga den e division di Honor.
Historia ta conta nos cu den pasado, e ekipo di Estrella a logra titula campeon di division Honor na 12 ocasion, mientras cu a sali sub campeon pa 16 biaha. E ultimo biaha cu SV Estrella a titula campeon den division honor tabata den e campeonato di aña 2005-2006 y a gana den e wega final contra SV Britannia.
SV Estrella ta conta cu sosten di su patrocinadonan Stelaris Casino (Marriott Resort Aruba).