ORANJESTAD, Aruba: E teamnan di futbol ta preparando nan mes duro pa competi den e campeonato di division di honor 2017-2018 di futbol cu ta inicia diabierna dia 13 di October proximo. E 10 teamnan sea a prepara nan mes ta train nan so of cu otro pa asina sa kico ta e ultimo detayenan cu falta. SV Britannia y SV Estrella a topa otro den un wega di preparacion pa asina cada uno mira e detayenan cu falta.
Coach di division honor di Britannia, Gilberto Spataro a splica cu e encuentro aki tabata pa nan tin un evaluacion con e teamnan ta bayendo. Nan tin 1 luna y mey ta train y e ta mira cu esaki ta bayendo bon. Nan ta sinti nan mes positivo aunke cu e mundo di futbol sa, cu Britannia a perde casi 15 hungado compara cu aña pasa. Esaki a pone cu nan a renoba e team cu nan mesun hungadonan hoben pa asina caba cu e puzzel.
Pa cu henter e campeonato e futbol di Aruba ta spera di mira e team di Britannia den play-off, pasobra tur aña Britannia ta drenta play-off. E aña aki esaki ta nan meta, asina e coach a indica. E temporada ki Britannia lo ta un team cu lo lucha hopi riba veld y no ta tur su weganan lo ta facil. Gilberto Spataro a desea tur team exito pe temporada aki y e aña aki lo ta uno cu hopi cambio, unda cu tur team a reforsa nan mes hopi bon.
Tocante SV Britannia
A funda SV Britannia dia 12 di October 1958. E ekipo a sa di crece den e ultimo 59 añanan te bira un organisacion di mas di 300 futbolista. Nan ta parti entre futbolistanan di 4 aña te cu veteranonan, cu ta inclui division di damas, LIFIDA, liga hubenil, menor, mayor y junioren, hoofdklas y veterano. Den LIFIDA nan ta participa den Mini Baby, Baby, Lifida A y B.
Cedric Werleman ta Presidente di e organisacion, mientras cu Gilberto Spataro ta coach di e ekipo di 24 futbolista cu ta hunga den e division di Honor.
Historia ta conta nos cu den pasado, e ekipo di Estrella a logra titula campeon di division Honor na 4 ocasion, mientras cu a sali sub campeon pa 6 biaha, 4 biaha na di 3 luga y 1 biaha a keda na di 4 luga. E ultimo biaha cu a titula campeon tabata den e campeonato di aña 2013-2014.
SV Britannia ta conta cu sosten di su patrocinadonan Friesche Vlag di Compra Ltd, Bright Bakery, Western Union, Pizza Hut, Total Finance y Vita Malt.
SV Britannia ta train di dialuna pa diabierna den oranan di atardi pa anochi. Pa esunnan interesa pa join, por subi nan pagina di Facebook “BritanniaAruba” pa haya mas informacion.