Seroe Patrishi: Diadomingo algo pasa di 6’or y mey di mainta, polis ta wordo manda na altura di ex veld di Siboné na Seroe Patrishi, pa un caso di ladronicia.
Na yegada polis ta bin topa cu e victima di ladronicia para na su auto y e ta splica polis cu ela caba di sali for di un conocido club nocturno na Palm Beach, pafo ela top dos damita cu a pidi’e lift pa Seroe Patrishi. E chauffeur a dicidi di duna e dos damitanan lift y mesora e damitanan a bisa e chauffeur cu nan supuesto dos primonan tambe mester di un lift, e chauffeur sin pensa dos bes a duna nan lift. Riba caminda e chauffeur a habri e dashboard pa coi algo y aparentemente e ocupantenan lo a mira cu e tabata tin un gran cantidad di placa den e dashboard.
Na altura di e veld di Siboné, un di e damitanan a cuminsa distrai e chauffeur y aparentemente door di e bentana un di e supuesto primonan lo a pasa man cu e suma di placa y a core bay, segun e chauffeur ta trata di dos mil dollar.
E dos damitanan tambe a purba huy pero e chauffeur a wantanan te ora polis a yega na e sitio. Polis a papia cu e dos damitanan y nan a bisa polis cu nan no tin nada di haber cu loke e dos supuesto primonan a haci.
Polis a conseha e chauffeur pa bay entrega keho na recherche, ya cu ta trata di su palabra contra di e otronan.