Piedra Plat: Diadomingo pa mas o menos 2’or di marduga, polis y ambulance ta wordo pidi cu urgencia riba e caminda di Piedra plat un poco mas pabou di Jontai, pa un accidente frontal cu a caba di sosode.
Na yegada nan ta bin nota cu ta trata di un accidente frontal, den cual un di e chauffeurnan lo a hala dimas na su man robes y a bay dal contra e auto biniendo di direccion contrario.
E Nissan Sentra maneha pa un cabayero tabata biniendo di pabou y di pariba tabata biniendo e Toyota Yaris maneha pa un dama. Pa un of otro motibo un di nan dos lo a hala dimas na su man robes y a bay dal frontal contra e otro.
Ambos Chauffeur a keda herida, e cabayero a ricibi un corta basta grandi y profundo na su cara, mientras e dama haya kap na cabes y tabata sangrando bastante.
Personal di ambulance, despues di a tratanan na e sitio a transportanan pa hospital.
E caminda dilanti Jontai a keda pa casi dos ora cera, te ora cu takelwagen a bin hala e dos vehiculonan for di riba caminda.