Home Local IMPACTO ECONOMICO TURISMO CRUCERO 2017: MINIMO DI $ 85.5 MIYON

IMPACTO ECONOMICO TURISMO CRUCERO 2017: MINIMO DI $ 85.5 MIYON

SHARE

A.T.A. ta tene exitoso tercer edicion di ‘Cruise Symposium Aruba’

ORANJESTAD – Turismo crucero ta forma un parti integral di Aruba su desaroyo di turismo. E siman aki Aruba a conoce su di tres edicion di e ‘Cruise Symposium Aruba’, organisa pa Aruba Tourism Authority.

Mundialmente nos por mira un continuacion cu biahe y turismo ta destaca den e sector economico, contribuyendo cu 10% na e GDP global y apoyando na 1 di cada 10 trabaonan riba nos mundo.

Manera nos tur sa, biahe y turismo ta representa 88% di Aruba su GDP, cu ta significante mas halto compara cu e averahe mundial. 89% di nos empleo total ta directo of indirecto relata cu biahe y turismo.

Durante e programa di Cruise Symposium, Ronella Tjin Asjoe-Croes – CEO di Aruba Tourism Authority a duna di conoce cu A.T.A. ta continua di monitorea e industria crucero. Aspectonan manera combustible cu ta subiendo den prijs, enfoke pa cu bienestar y sostenibilidad pa cu cruceronan den futuro, ta wordo teni na cuenta.
Aruba su direccion strategico y su prioridadnan pa 2018 no a cambia significante pero e accion y e obhetivonan a wordo ahusta segun e desaroyo y e tendencianan trec’i dilanti.

Tjin Asjoe-Croes a comparti cu un di e obhetivonan pa 2018 ta pa turismo crucero crece cu 7% compara cu 2017. Tambe a ilustra cu e impacto economico pa medio di gasto di bishitantenan crucero a subi di $72 miyon pa $85.5 miyon, cu ta locual ta proyecta pa e aña aki. Adicionalmente ta proyecta cu turismo crucero lo crece cu 16% den pasahero e aña aki compara cu aña pasa, y pa 2018 esaki lo surpasa 7% di crecemento, cu ta basa riba bishitanan durante temporada abou.

Como parti di encuesta conduci pa varios linea crucero, Aruba ta sigui destaca como un di e destinacionnan faborito den e region di Caribe riba nan iterinario. “No obstante e resultadonan aki, hasta e miho resultado den mundo ta keda insignificante si e no wordo mantene. Esey kiermen cu nos destinacion mester sigui intenta pa semper mehora y mantene nos producto na un nivel halto”, Tjin Asjoe-Croes a laga sa.

Segun Mario Arends, Cruise Manager na Aruba Tourism Authority, desde 2016, A.T.A. mes ta conduci encuesta bao nos bishitantenan crucero, cual ta enfoka entre otro riba e satisfaccion di e turista crucero, cuanto e ta gasta na Aruba durante cu e ta bishita nos isla, si nan ta bolbe Aruba y si nan lo recomenda nos destinacion.
38% di e turistanan crucero ta mira nos destinacion como uno di beach y 28% ta mira nos como e isla mas cariñoso. Ademas 10% ta wak nos como e luga mas feliz. Durante su presentacion, Arends a elabora riba e perfil di nos bishitantenan crucero, entre otro nan edad, ganashi anual y naturalmente cuanto nan lo gasta riba nos isla durante nan bishita.
E average cu un turista crucero ta gasta actualmente na nos isla ta un promedio di US$ 112.36 pa dia pa cada persona.

Lex de Ridder, Chief Commercial Officer di Aruba Ports Authority a comparti e ‘Master Plan’ di nos waf en general, unda for di diferente angulo por a mira con nos waf ta embeyece/expande y ta aumenta na e experiencia di nos bishitantenan. Awendia, liñanan di crucero cada biaha ta bin cu barconan mas luhoso y mas grandi. A percura pa e cambionan necesario pa embeyece y asina nos waf lo keda primordialmente pa uzo exclusivo di e cruceronan.

“Nos tur tin un storia unico pa comparti” segun Rosabelle Illes durante su presentacion, na unda el a elabora riba e manera con nos ta mira y papia di nos destinacion cu nos bishitantenan. El a pone enfoke riba nos ‘One happy island’ y kico ta haci nos un destinacion contento, poniendo enfasis riba diferente aspectonan cu por wordo combersa cu nos turistanan.

E orador principal Amilcar ‘Mico’ Cascais a comparti actualizacionnan pa cu e industria crucero mundialmente pero tambe loke Aruba mester pone mas enfoke riba dje, entre otro nos DNA y con pa trece y comparti esaki no solamente cu e turistanan crucero pero tambe cu e (futuro) lineanan crucero cu Aruba riba nan itinerario.

Cruise Symposium Aruba 2017 ta un iniciativa local cu a resulta exitoso cu participacion di esnan cu ta traha sea directo of indirectamente cu e industria di turismo di crucero. Asina hunto entre otro ta yega na un miho sinergia, miho coordinacion y miho analisis pa eleva e experiencia di e turista crucero cu al final lo mester traduci su mes den aumento pa loke ta trata di loke nan ta laga atras den nos economia.

Un gradicimento ta bay na tur stakeholders cu a percura pa e dia aki un exito. Cu e tipo di eventonan asina aki ta haci un esfuerso adicional pa conserva nos posicion como destinacion crucero di nivel halto, considera como un di e miho destinacionnan den Caribe.