Bijlmermeer: Diaranson, exactamente 25 aña despues di e tragedia di Bijlmer, e brug di Pa Sem a keda oficialmente inaugura. E brug ta situa na e pia di e Flat Groeneveen, den cual 25 aña pasa E avion di El Al a crash den dje , den cual 43 persona a perde nan bida y centenares a keda herida. Yiunan di Pa Sem tabata presente durante e inauguracion di e brug Pa Sem Brug.
Ken ta Pa Sem?
Pa sem, su nomber oficial ta Willem Jacob Symor, naci na Surinam na aña 1936. Na aña 1975, Pa Sem a imigra pa Hulanda y a bay biba na Rotterdam, unda ela traha riba waf di Rotterdam te na aña 1986, despues cu ela wordo afgekeurd pa traha, ela verhuis bay Amsterdam, unda e por ta mas cerca di su yiunan.
Het Groentje
Ela bay biba den e flat Groeneveen den Bijlmermeer y akinan ela haya un lugar cu ela converti den un Buurthuis y un creche pa muchanan di e bario y a yame, “Het Groentje”. Pa Sem tabata un homber hopi streng, di principio, pero cu un curason hopi noble. Especialmente mamanan soltero mayoria parti tabata laga nan yiunan cerca dje den Het Groentje.
Tragedia 4 di oktober 1992
Dia 4 di Oktober 1992, Pa sem tabata den Het Groentje y tabata babysit 8 mucha, na momento cu ela tende un explosion masha fuerte mes. Na prome instante ela puntra su mes ta ken lo ta hungando cu vuurwerk, pero hopi liher ela cuminsa mira vlamnan di candela y a mira hendenan ta huy via trapi, otro tabata bay den panico y tabata bula abou for di e pisonan halto di e flat. Mesora ela core cu bay cu e muchanan te na e Metro Station, na yegada ela ripara cu ta 7 mucha so a bin cune. Mesora un mucha muher chikito, a bise cu su ruman homber di 10 aña Reinaldo a keda atras na Het Groentje.
Su acto Heroico
Pa Sem a dicidi mesora di core bay bek, den tur e caos, hende gritando, otro bulando for di halto, varios persona a purbando na tene pa e no bay paden bek, pero asina mes ela pushanan y a logra drenta paden den vlamnan feros di e candela, ela bin topa cu Reinaldo gritando pa ayudo, mesora ela pasa man pa e mucha, yegando na e porta pa sali pafor, un tubo tur na candela a bin abou, Pa Sem pa evita cu e tubo lo a cay riba e mucha su cabes, ela gara e tubo tur na candela cu su man y a bisa e mucha pa e pasa bou di e tubo, bay pafo y core. E tubo a smelt pega na Pa Sem su man y su panja a cuminsa coi candela, na prome instante Pa Sem a pensa te aki su bida a yega, pero ela keda na tino y despues di un rato ela recobra forsa y tur na candela ela logra sali pafo.
Kemaduranan di tercer grado
Willem Symor a keda tres siman den coma y a wordo trata pa kemaduranan di tercer grado, ela logra sobrevivi pero a keda marca cu cicatris di e tragedia pa resto di su bida. Pero segun Symor, si e no a bay buska Reinaldo e mucha lo no a sobrevivi e candela y e tampoco no lo por a sigui biba cu su consenshi y es mas, e no lo tabata tin e forsa pa sigui biba, paso e mamanan tabata confia nan yiunan den su man. Reinaldo dos siman despues di e tragedia por a bay scol bek.
Pa Sem a ricibi kemaduranan serio di tercer grado y mester a ricibi un tratamento pa un periodo basta largo na e conocido Brandwondencentrum na Beverwijk.
Reconocimento
Pa su actuacion heroico, un aña despues ela haya un reconocimento cu masha poco ta wordo duna Un Erepenning voor Menslievend hulpbetoon. E alcalde di Amsterdam di e tempo ey a entregue.
Pa Sem nunca a haya cu e merece un reconocimento, paso segun su persona ela actua paso e mester a haci asina, paso si e no a bay bek busca e mucha e mucha lo a muri y nunca elo por a sigui biba cu esaki.
Pa sem ta fayece na Surnam
Na 1995 Symor a bay bek Surnam y a cumpra un cas na Paramaribo, unda ela keda biba te riba e anochi di 3 pa 4 di september 2008, ela fayece na e edad di 71 aña, ela laga su señora, yiunan y nieto atras.