Nos ta respeta desicion di pueblo
Informador ta finalisando conbersacionnan cu tur partido y awor nos por procede pa e siguiente paso cual ta firma un convenio pa asina Informador entrega su raport na Gobernador. Partido MEP a expresa su disponibilidad pa traha hunto den coalicion pa asina cuminsa sanea e situacion financiero di nos pais.
Riba e reaccion di Partido AVP cu ta bisa cu nan ta mira e gobierno nobo como uno instabil y cu lo no dura largo, Lider di MEP, sra Evelyn Wever-Croes ta reacciona: “Mi ta kere cu Partido AVP ta liber pa expresa su mes pero aki no ta trata loke AVP ta kere of pensa, sino e respet cu nos ta mustra na e decision di nos pueblo cu a vota pa un coalicion.
Nos ta reconoce cu un gobierno di coalicion no ta mes stabil cu un gobierno cu un mandato absoluto. Nos sa tambe cu un coalicion semper ta trece cu ne mas “checks and balances” pero tambe nos sa cu esaki lo tin mas riesgo. Y esaki ta conta pa Partido AVP tambe cu esnan cu nan kier forma cu n’e. Awor direpente AVP kier forma gobierno, y e mesun instabilidad aki lo conta pa nan tambe.
Pa e motibo aki, ta hopi importante pa expresa cu cualkier convenio cu nos yega na dje cu cualkier partido, lo ta basa riba e hecho cu nos tur kier un gobierno stabil, firme y duradero cu lo sinta e 4 añanan aki y cu por tuma desicionnan cu pais Aruba tin mester di dje”.