Home International Caitlin Spencer su storia, abusa sexualmente door di miles di homber y...

Caitlin Spencer su storia, abusa sexualmente door di miles di homber y ta buscando husticia

SHARE

LONDEN – Caitlin Spencer ta victima di traficacion di hende y victima di un caso grandi di abuso sexual di mucha. Segun Caitlin miles di homber a abusa di dje y e tin e gevoel cu pa autoridad su caso no tin urgencia.

Caitlin Spencer, cu no ta su nomber real, pero pa protehe su mes e ta usando e nomber aki.

“Please let me go”

Recientemente, Caitlin Spencer a scirbi un buki cu yama “Please Let me go” cu a keda publica den luna di Augustus 2017. Den e buki aki, e ta conta detayadamente di e bida horrible cu ela hiba na man di e gruponan di traficador di hende y durante e abusonan sexual door di miles di homber, con nan tabata maltrat’e, skop’e y hopi mas.

Abusa sexualmente pa 15 aña largo

Spencer a wordo sexualmente abusa pa 15 aña largo, 11 biaha ela sali na estado, 7 biaha ela haci abortus, dos biaha ela perde barica y for di e abusonan aki a nace dos yiu muher.

Ela keda trauma pa resto di su bida, pero e abusadornan si te ainda ta den libertad. Esaki ela bisa un journalista di The Mirror, dia cu ela publica e buki.

E abuso a cuminsa tempo e tabata tin 14 aña

E abusonan a cuminsa tempo e tabata tin 14 aña, Caitlin a mira un aviso den corant cu nan ta buskando fotomodel, ela reaciona y e persona aki a keda di pasa na su cas pa saca su potret. Un homber decendiente di Pakistan a presenta y e dia ey ela wordo abusa sexualmente door di e persona aki y ela wordo prohibi di conta di loke a pase.  Despues cu e abuso a sosode Caitlin a bay baña y a cera su curpa den camber y no tabata tin e durf di mira su famia, ela duna su mes tur e culpa.

Menasa di morto of di kima su cas

Despues esaki a sigui y  mester a bay traha pa clientenan di e homber Pakistani, paso nan a cuminsa menas’e cu si e no haci’e, nan lo mat’e of nan lo kima su cas.

Caitlin no ta corda tur e hombernan cu a abusa di dje tempo e ta mucha, pero un di nan tabata un politico local, y cu despues ela keda den shock di a mira un persona cu a abusa di dje den un posicion cu asina hopi influencia, claro e tabata furioso.

Prome alarma a wordo bati 

Te na momento cu ela sali na estado den su diario su mama a lesa esaki y mesora a sali pidi ayudo pa su yiu, ela bay polis pero nan a bisa e mama cu ta un proceso largo y polis a bisa e mama cu su yiu ta un prostituta hopi conoci y cu ta su mes mester stop cu e bida aki.

Hopi Dolor, droga y alcohol tabata pa domina e dolor

E abuso a sigui y otro chulo a cumpre, tin ora e mester a soporta abuso sexual den grupo di hombernan y e tabata wordo filma te riba e dia di awe por mira filmacionnan aki riba internet.

Fisicamente Caitlin tabata haya hopi dolor, ela siña cera su mes pa esaki, pero no ta facil, no ta tur ora e ta logra y tin cu usa droga of alcohol pa soporta tur e dolor y sufrimento. Den e bida di prostitucion cu ela hiba, ela wordo menasa cu cuchiu.

Ayudo y asina por a huy for di man di e traficadornan di hende

Na 2013 Caitlin a cuminsa haya ayudo di instancianan y oficialmente nan a consider’e un victima di traficacion di hende, esaki a pasa despues cu ela logra huy for di e gara di grupo criminal cu a cumpre. Via un miembro di famia cu ta biba na Australia, ela huy hunto cu su dos yiunan. E paso grandi aki ela tuma na momento cu un di su yiunan tambe a hera bira victima di abuso sexual.

Sufriendo di Trastorno di stress posttraumatico y no por ta un fuente confiabel

Su lucha pa husticia a cuminsa, ela entrega den man di autoridad un cantidad di potret di Facebook di 80 miembro di e gang criminal aki cu ela colecta hunto cu polis, pero no por a wordo usa den su caso.  Door di tur e añanan y e cantidad di abuso sexual cu e mester a soporta, Caitlin Spencer ta sufri actualmente di trastorno di stress posttraumatico y pa e motibo aki autoridad no ta consider’e un fuente confiabel paso e la keda cu hopi buraco den su memoria.

Plama e informacion rond por medio di su buki

Tambe nan a bise cu e material di DNA no ta suficiente prueba, pesey mayoria di e abusadornan ta cana liber rond. Segun Caitlin e no por laga nan gana e bataya y ta haci tur loke ta den su man pa plama e informacion rond y pesey ela scirbi e buki, pa tur hende por haya sa kiko tur e como un mucha di 14 aña mester a soporta pa 15 aña largo, na man di e traficadornan di hende cu ainda ta den libertad.