64
Diasabra ultimo a tuma luga e di 8 Aruba Caribbean Cargo Taekwondo Cup na Centro di Bario Brazil cu participacion di e
siguiente scolnan di Taekwondo na Aruba:
1. Noord Taekwondo Center di Grand Master Chaco Cornelio y su coach Ivan Jansen.
2. San Nicolas Taekwondo Center di Master Eric Barry y su coach Shaul Illidge.
3. Stichting Tiger Taekwondo Academy cu nan coach Albert Thielman.
4. Stichting Caribbean Taekwondo Institute cu nan coach Moices Fernandez jr.
5. Brazil Taekwondo Stichting cu nan coach Jourdé Klabér.
Na tur campeonato e refereenan tin un tarea y nan ta reuni hunto pa analisa e campeonato pa asina yega na e conclusion
kendenan ta nan miho bringadornan di e campeonato den cada categoria. Den e categoria di infantil nan a scoge Jewell Illidge
como nan miho bringador infantil mucha muher. Esaki ta e di tantisimo premio cu e damita chikito aki ta gana den su categoria
te cu 11 aña. Jewell Illidge semper a duna un bon bataya contra di tur su contrincantenan sea nan ta mucha muher of mucha
homber tur ta haña e mesun scop.
Nishon Dunlock ta un otro prospecto cu ta na caminda, mustrando for di awo caba cu e ta cla pa bringa y su manera di para so ta
laga sa cu e la bin pa bringa. Nishon Dunlock ta hala masha hopi atencion pa su forma di bringa y e ta mustra un bon Taekwondo
for di awo caba cu ta laga e refereenan sin duda di escoge como nan miho bringado infantil.
Dudi Perez ta bay y bin pero e biaha aki e la bin pa keda y a duna su miho combate contra su contrincantenan cu scorenan absurdo.
Tin un dicho cu ta bisa cu tur cos cu bin di leu ta bon. Dudi Perez a demonstra esaki y a wordo escogi como miho bringado cadet damas.
Rasheed Lowe no ta un atleta desconoci pa e refereenan, apesar cu e no a logra di biaha e aña aki internacional e la duna un bon bataya
den e categoria di cadet y a logra sali best fighter.
Záhyon Klabér ta un di nos atletanan elite cu ta representa Aruba internacionalmente cu un experencia hopi mas halto cu su contrincantenan
y ta haci e trabou di e refereenan hopi mas facil pa nan escoge Záhyon Klabér como nan miho bringado den e categoria di junior.
E pelea di dia a bay entre di Micheal Noel y Keith Cayama, pasobra aki por a mira un pelea cu hopi intercambio di scop cu bon nivel cu e publico
a disfruta y na final di e pelea a pone cu nan a klap pa e bon Taekwondo. Micheal Noel a gana contra di Keith Cayama y a wordo escogi como e
miho bringado den e categoria di adulto.
Shaul Illidge a wordo escogi como e miho coach di e evento. Shaul Illidge a bin ta demonstra esaki pa basta tempo caba y a lanta e nivel di San
Nicolas Taekwondo Center y awo un biaha mas a sali best coach. Tur ta puntra e mesun cos for di unda e la bin. Un cos ta sigur, si Shaul Illidge sigui
cu e bon trabou aki e lo yega hopi leu na Aruba y asta internacional.
Brazil Taekwondo Stichting ta gradici tur e scolnan cu a participa na e campeonato aki, haciendo esaki un campoenato cu un nivel mas halto cu esun
di ayera. Cada dia Taekwondo na Aruba ta crese na un bon nivel.