Home Local Famianan a pasa un dia dibertido cu e Family Fun Day di...

Famianan a pasa un dia dibertido cu e Family Fun Day di YMCA Aruba

SHARE

ORANJESTAD, Aruba – 4 di October 2017: Diadomingo ultimo YMCA Aruba tabatin nan di 2 Family Fun Day na YMCA San Nicolas, unda cu muchanan a presenta hunto cu nan mayornan pa pasa un dia agradabel. Desde 10:00 di mainta te cu 4:00 di atardi tur hende a diberti y no tabata kier a bay cas. YMCA a haci diferente actividad y nan tabata super dibertido, unda cu e muchanan y e boluntarionan a competi contra otro.

 

E dia di famia a bay bon y hopi mucha a presenta, cual tabata algo cu YMCA Aruba tabata kier, asina Youth Worker di YMCA Aruba, Sherwin Wester, a splica. Riba e dia aki a enfoca pa siña e muchanan e weganan nobo, socialisa cu otro y pa sali for di cas pa pasa un dia dibertido. E dia a cuminsa cu un competencia di trefbal entre empleadonan di YMCA, muchanan y algun mayor. Tambe a haci uzo di diferente material y a pone nan den un hoelahoep pa asina e muchanan mester a pasa esakinan pa otro banda, cual wega tabata special pa muchanan.

 

E muchanan tabata hopi contento, unda cu nan a pasa un dia agradabel y dibertido. Hopi di e weganan e muchanan no tabata sa di nan, pero na final nan a pasa bon. E weganan tabata pa muchanan desde 4 aña bay ariba, pero asina mes tabatin muchanan bou di 4 aña cu tambe a disfruta di e dia.

YMCA Aruba ta gradici e mayornan cu a yuda cu e Family Fun Day, tambe nan sponsor Aqua Vera. Nan a ricibi sponsor di 10 caha di awa “Dushi Awa”.