Home » Con Gabinete Eman lo laga e caha di gobierno na 2017?

Con Gabinete Eman lo laga e caha di gobierno na 2017?

by Admin
0 comment 60 views

Marlon Sneek a mustra un biaha mas su ignorancia pa loke ta e situacion financiero di pais Aruba

Despues di e resultado devastador pa AVP den e eleccion ultimo, caminda e partido aki a bay atras cu 10 mil voto, 4 asiento y cu tur candidato di AVP a bay drasticamente atras den voto, awor lider di fraccion, Marlon Sneek kende tambe a bay atras cu 21% di voto ta sigui biba den su ignorancia pa loke ta e situacion financiero cu su partido lo laga atras dentro di algun siman. Cu esaki Marlon Sneek a mustra un biaha mas na henter comunidad con amarga y decepciona el a keda despues di e caida drastico den voto di su partido den e eleccion ultimo.

 

Deficitnan astronomico

Hecho ta cu durante henter e campaña pa e eleccion ultimo, MEP semper a trece padilanti den ki situacion Gabinete Eman lo laga e pais aki na 2017, caminda nos a mustra cu cifranan concreto con entre 2010 y 2016 e gobierno di AVP a crea un averahe na deficit di -294 miyon florin pa aña y di cual un record na deficit di -443 miyon florin na 2012. Y sin duda cu tur e deficitnan astronomico aki a conduci cu awe nos pais ta horca cu un redoblacion di nos debe nacional te na 4.2 biyon florin, sin conta acerca tur e debenan di e proyectonan PPP cu ta un otro 2 biyon florin extra na debe.

 

Presupuesto supletorio

Alavez na varios ocasion partido MEP a mustra riba e hecho cu te ainda nos no tin un bista cla cuanto gasto extra partido AVP a haci den e campaña electoral aki y cual gastonan lo mester ser refleha den e presupuesto supletorio 2017 cu lo ser trata na fin di e aña aki. Hecho ta cu durante di e periodo pa eleccion 2013, partido AVP a haci gastonan extra den nan campaña riba custia di pueblo y cual a suma na 64.4 miyon florin, segun Jaarrekening 2013 di Algemene Rekenkamer. Partido MEP ta tene su curason pa haya sa cuanto e campaña miyonario di AVP lo bay costa nos pueblo den e presupuesto supletorio 2017.

 

Decadencia den maneho financiero

Sinembargo teniendo cuenta cu e desaster financiero cu AVP a laga nos pais aden, lo ta bon pa na lugar cu Marlon Sneek den su frustacion papia un hala di disaparate, contesta e siguiente preguntanan cu MEP ta haci publicamente na su persona:

  1. Unda e presupuesto 2018 di pais Aruba ta? No ta asina cu e presupuesto aki segun ley mester a wordo entrega na parlamento dia 1 di September 2017?
  2. Cuanto e deficit ta den e begroting di 2018? Segun e ley di CAFT lo mester tin un surplus di 25 miyon florin pero di acuerdo cu un carta di Departamento di Finansa di dia 3 di October 2017 tin un deficit di 195 miyon florin. Con Marlon Sneek por hustifica e deficit aki pa loke ta e maneho financiero hiba pa Gabinete Eman?
  3. Kico ta e plan di AVP pa hisa e BBO? Na lugar di elimin’e manera cu el a priminti, Mike Eman a laga tur cos cla pa his’e na 8%?
  4. Unda e presupuesto supletorio pa 2017 ta? Cuanto AVP a surpasa e presupuesto pa 2017 te cu awor aki?

Sin duda cu tur e preguntanan aki merece un contesta debido di parti di Marlon Sneek. Y alavez mester tene na cuenta cu e tambe a forma parti di fraccion di AVP y semper a aproba ciegamente tur loke e gobierno aki a manda pa su persona y e otro 11 marionetanan di AVP. Awor cu e pais ta na werki financieramente, Marlon Sneek no por bin padilanti cu e pretexto cu su gobierno a hiba un maneho financiero drechi y responsabel. Hecho ta cu Abo Marlon Sneek a forma parti di e decadencia financiero aki!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio