153
SANTA CRUZ — Conseho di Partido di MEP den su reunion e siman aki a reitera e mandato na lider di MEP Evelyn Wever-Croes pa yega na un coalicion cu base amplio cu partidonan RED y POR.
Esaki despues cu lider di partido y presidente di partido a duna un briefing di e reunion cu Informador, y principalmente mustrando riba e problemanan financiero serio cu gobierno di Mike Eman tin Aruba aden, y e falta di cumplimento severo di parti di gobierno di AVP. Esaki ta pone hopi mas presion riba e partidonan cu kier ehecuta nan programa cu nan a bai eleccion cun’e, pero cu e desastre financiero cu Mike Eman ta lagando atras, por stroba.
Ya un dia despues di eleccion Conseho di Partido a duna e mandato na lider di MEP pa sondea e posibilidadnan pa formacion di un coalicion. Despues cu e disponibilidad a keda expresa pa tur tres partido MEP POR y RED, y e formacion a drenta den e sigiente fase, lider di MEP a bolbe busca mandato y aprobacion di Conseho di Partido pa continua.
Mester remarca cu tur miembro di Partijraad a duna nan sosten na e proceso aki, y tur rumor cu si tin problema interno den partido MEP, ta falso. MEP ta mas solido cu nunca, y den bon dialogo y transparencia, ta canando e caminda di formacion di gobierno, cu cabes friew y cu seriedad. Partido MEP ta sumamente orguyoso di su lider y e forma con e ta atendiendo cu e proceso aki, y a reitera su sosten na Evelyn Wever-Croes.