Home Politics LIDER DI MEP EVELYN WEVER-CROES DESPUES DI REUNI CU INFORMADOR SITUACION...

LIDER DI MEP EVELYN WEVER-CROES DESPUES DI REUNI CU INFORMADOR SITUACION FINANCIERO DI PAIS ARUBA TA HOPI MAS SERIO CU NOS A SPERA

SHARE
ORANJESTAD — Dialuna lider di partido MEP Evelyn Wever-Croes y presidente di partido MEP dr. Gerrit Croes a reuni cu informador sr. Arie Swaen.
Durante e reunion di parti di partido MEP a duna di conose e disponibilidad pa yega na un coalicion cu base amplio.
Durante di e reunion e delegacion di MEP a ricibi hopi mas informacion cu ta mustra cu e situacion financiero di pais Aruba ta hopi mas serio cu a spera.
 
“Nos sa cu gobierno di Mike Eman ta violando ley y no a presenta e presupuesto 2018 na Parlamento na tempo. Pero loke nos no tabata sa ta cu tin un deficit di 175 miyon florin den e presupuesto ey, siendo cu segun e ley di CAFT cu gabinete Mike Eman mes a bin cun’e, pa 2018, mester tin un surplus di 25 miyon florin. Kiermen, cu pa 2018 nan tin premira 200 miyon mas na gasto cu ta permiti. Esaki naturalmente ta un problema serio, pasobra ta con bo ta bai sera e buraco financiero di 200 miyon pa otro aña?
Loke ta hasi e situacion mas serio ainda, ta cu pa aña 2017 tambe gabinete Mike Eman a surpasa nan presupuesto, tambe cu sumanan astronimico cu e campaña politico miyonario cu nan a hiba. Y e cuenta aki mester wordo presenta ainda na pueblo. Na final di dia ta e cuidadanonan di pais Aruba mester bai paga pa e gastonan aki.
Naturalmente ta hopi iresponsabel di Mike Eman, Angel Bermudez y henter e gabinete, pa benta e problemanan serio aki awor den scochi di un gobierno nobo. Mas aun, ami ta di opinion cu esaki ta un crimen contra nos comunidad cu nan mester wordo teni responsabel pe.
 
Cumpliendo cu deseo di pueblo pa un coalicion, partido MEP lo sigi pone esfuerso den realisa esaki, apesar cu ta un tarea sumamente dificil pa drenta gobierno y soluciona tur e problemanan cu gabinete Mike Eman a crea. Nos ta carga nos responsabilidad pa ofrese Aruba un gobierno integro, transparente, innovativo y cu ta trata finansas publico di nos pais na forma mas responsable. Esey tabata nos compromiso cu nos pueblo y nos lo percura pa cumpli cune