92
Santa Cruz- Na prome lugar Comision di Mayor di Trupial Kleuterschool kier desea tur mucha y maestronan un dushi vakantie awe riba e prome dia oficial di oktober vakantie 2017.
Alaves Comision di Mayor conhuntamente cu e maestranan di Trupial Kleuterschool kier comparti un poco di informacion di e caminata di e anja aki.
Nos ta organisa un caminata pa recauda fondo pa nos scol. E caminata aki ta tuma lugar diasabra 4 di november 2017 y ta sali 5.30pm for di Hulpbestuurskantoor Santa Cruz y lo termina mesun caminda. Ta bay tin dos opcion di ruta. Uno largo di 5km y uno mas cortico special pa nos muchanan, asina full famia por bin core of cana y pasa un rato ameno y aporta na nos skol. Riba cada ruta tin un post di awa. Pa 5.00pm lo cuminsa cu un zumba warm up. Registracion ta cuminsa 4:00pm. Mester registra pa ricibi un ticket pa participa den e tombola pa asina tin chens di gana un di e tremendo premionan. Si bo no por bin cana no ta nada, por lo menos bin registra bo ticket ya bo por gana un di e tremendo premionan.
Meta di e caminata e aña aki ta pa recauda fondo pa drecha e bentananan y haci nos skol mas sigur. Pensa cu bo ta yuda awe pa nos yiunan cu ta actualmente na nos scol. Pero tambe pa e muchanan cu den futuro lo bishita nos school cu por ta bo nieta, bo prima, bo subrina, un bisiña of un conocir.
Ticket ta obtenibel cerca tur mayor di e alumnonan na nos scol y tambe serca tur e maestranan. Despues di vakantie por haña ticket na scol Trupial Kleuterschool mes. Por yama school na 5852250 entre 8:00am y 1:00pm. Tambe por like nos FB page, Trupial Kleuterschool Recauda Fondo, pa bo por keda up to date cu tur informacion di nos caminata.
Pueblo di Aruba cumpra bo ticket pa solamente afl 5 y aporta na nos scol y ban cana diasabra dia 4 di november pa yuda nos scol, Trupial Kleuterschool.