Home Police Detencion di dos homber cu a wordo haya cu XTC, Molly, Cocaina,...

Detencion di dos homber cu a wordo haya cu XTC, Molly, Cocaina, Marihuana y pida LSD

SHARE

Sasaki – Diadomingo marduga pa mas o menos 2’or y 50, durante patruya polis ta bin topa riba parkeerplaats di “Heart Music Aruba Cafe” un auto Honda Fit, color shinishi numera A 54645, un homber tabata para na e auto banda di ocupante. Na momento cu e homber a mira e patruya di polis biniendo den su direccion ela move y a cuminsa cana hopi liher bay direcion pazuid.

Mesora e agentenan policial a baha for di e patruya y a acerka e homber, nan a nota cu e homber tabata tin algo den su man robes, un pida saco di plastic tabata sali for di su man. E agentenan a dirigi nan mes na e homber aki y ela a cana bay bek na e auto shinishi y e cos cu e tabata tin den su man, ela tira den e auto riba e sienta patras, via e bentana habri. E agente a lusa cu su flashlight den e auto y a mira algun saco di plastic conteniendo algun pildo berde, mesora e agentenan a cuminsa sospecha cu lo por ta trata di XTC

Pa e motibo aki e agentenan a pidi e chaufeur pa baha for di e auto y nan a fouilleer e dos hombernan, den e auto e nan a topa cu un saco di marihuana, algun pildo di XTC den saco riba e sienta patras, lo ta trata di e saco cu e homber un rato prome a benta riba e asiento patras, nan a hayanan cu un cantidad di substancia parecido na resto di cocaina, shete saco zip-lock cu un substancia parecido na MDMA( Molly) y tambe algun pida LSD.
 
 E dos personanan aki mesora a keda deteni, ta trata di RD Campo, naci na Venezuela dia 4 di juni 1982, sin lugar fiho di biba na Aruba y e otro homber cu a keda deteni, ta AJ Werleman, naci na Aruba dia 10 di mei 1984, biba na Santa Cruz.
 
Ambos sospechoso a wordo mesora transporta pa warda di San Nicolas y e auto a keda confisca pa mas investigacion.