Home International Pa prome biaha un pareha di e mesun sexo por a drenta...

Pa prome biaha un pareha di e mesun sexo por a drenta un enlace matrimonial oficialmente na Alemania

SHARE

Berlin, Alemania: Recientemente den e capital di Alemania a tuma lugar e prome matrimonio oficial di e mesun sexo. E pareha Karl Kreile di 59 aña y Bodo Mende di 60 aña, despues di 38 aña cu nan tabata biba felismente hunto, tabata tin e honor di ta e prome pareha di e mesun sexo cu a drenta un enlace matrimonial oficial. E tabata un celebracion hopi grandi den compania di mas di cien hende, entrenan amigo, famia y conocinan, e pareha aki a bisa otro Si.

393 parlamentario aleman a vota pro

Na Juni e parlamento aleman a bay di acuerdo pa pasa e ley caminda pareha di e mesun sexo por a drenta un enlace matrimonial oficialmente. E bondskanselier Angela Merkel a laga su partido CDU pa prome biaha vota tocante e cuestion aki.  Prome nunca ela pasa y e partido di Angela Merkel CDU tabata contra. Pero asina mes Angela Merkel hunto cu 225 otro miembro di parlamento a vota contra, pero na final 393 parlamentario a vota Pro y e matrimonio oficial entre pareha di e mesun un sexo a keda oficialisa.

Derechonan Igual

 Esaki ta significa cu parehanan di e mesun sexo ta haya e mesun derecho cu pareha hetero. Desde awo nan por adopta un mucha, tambe nan tin derecho di carga otro nan fam. Karl y Bodo a escohe pa mantene cada un nan mesun fam.

Michael Müller, e burgemeester di Berlin a felicita e pareha y e comunidad Gay cu a haci tur nan esfuerzo pa realisa e matrimonio di e mesun sexo. Tambe ela bisa cu ta un honor pa Berlin ta e prome cuidad aleman caminda e prome matrimonio di e mesun sexo a tuma lugar.

Segun un corant aleman riba e mesun dia 8 pareha homosexual a sigi Karl y Bodo, nan tambe a drenta un enlace matrimonial. 

Desde 2001 tabata solamente posibel pa e parehanan di e mesun sexo registra como pareha oficial y despues di mas di 16 aña alemania tabata cla pa acepta matrimonio di e mesun sexo.