ORANJESTAD, Aruba: Ereline Presentacion ta un empleado di Fofoti Tours & Transfers y e ta eynan pa casi 2 aña. Su funcion den e famia di Fofoti Tours & Transfer ta un driver y tour guide, pasobra e compania tin diferente servicio cu nan ta ofrece. Apart di ta un chauffeur, Ereline Presentacion ta enfoca completamente den e parti di crucero, di cual e ta encarga pa haci tour cu tur Cruise Line y tambe ta traha cu e parti di transporta localnan y grupo local.
Fofoti Tours & Transfer a scoge Ereline Presentacion como parti di e programa di “Ami ta Turismo” pa motibo cu e tin e calidad pa traha den turismo y tur hende mester tin esaki pasobra tur cos ta bin automaticamente, asina Sharlise Croes, director di Fofoti Tours & Transfer a expresa. Ereline Presentacion ta un persona cu tin hopi pasion pa loke e ta haci y ta un tremendo team player. Ora cu un persona tin e extra pasion pa su trabou, e ‘extra mile’ ta bin di su mes y no ta algo traha. Esey ta loke ta haci e trabou di Ereline Presentacion super facil cu clientenan, turistanan y coleganan.
Ereline Presentacion ta un persona cu ta cla pa yuda tanto su coleganan como turista. Un recuerdo bunita cu tin di dje ta con el a yuda un turista masculino cu a bay tur cu Fofoti Tours & Transfer, Ereline a percura pa yuda e turista na tur stop y e turista a bay bek hopi satisfecho cu e trato ricibi. Sharlise Croes a desea Ereline Presentacion pa sigui cu e bon trabou y pe sigui cu su pasion, pasobra e ta un persona cu semper t’ey pa tur hende.
Trahando den turismo, Ereline Presentacion tin 8 pa 9 aña den esaki pero e tin un conocemento di turismo. Su funcion como ‘tour guide’ ta bin ora cu e ta bay haci un tour cu turistanan di barco of hotel, tambe e ta chauffeur cual funcion ta pa haci transporte di aeropuerto pa hotel.
Ereline Presentacion a crece den turismo pa motibo cu su mayornan tabata traha den e area aki na Sint Maarten. Aki ta unda el a siña con pa traha den turismo y despues el a bin Aruba y traha den turismo. Ereline Presentacion a pasa den yen cos leuk durante su trabou sea cu turismo of coleganan.
Loke a resalta mas di dje ta ora cu e ta siña Papiamento na turistanan di hotel of barco y tin cierto palabra cu a zona casi mescos na Ingles. “E siñamento di Papiamento ta e parti cu mas mi gusta di mi tour. Mi sa cu nan tambe ta gosa y siña di nos dushi Papiamento di Aruba”, el a expresa.